Tags-Kitab

charāg hai, kitāb hai savāl hai, javāb hai
ki āsmāñ muñDer hai ki ye zamīñ bhī Dher hai

maiñ us ke badan kī muqaddas kitāb
nihāyat aqīdat se paḌhtā rahā

bikhar na jā.ūñ fazā meñ varaq varaq ho kar
havā kī zad meñ huuñ kohna kitāb kī sūrat

mumkin kahāñ ho haath meñ 'nāqid' tire qur.āñ
kāfir batā hai sāmne tere kitāb kyā

rahā pesh-e-nazar hasrat kā baab avval se āḳhir tak
paḌhī kis ne mohabbat kī kitāb avval se āḳhir tak

karegī dāvar-e-mahshar ko sharmsār ik roz
kitāb-e-sūfī-o-mullā kī sāda-aurāqī

varaq varaq pe tire ḳhāl-o-ḳhad haiñ aks-fagan
hujūm-e-yās meñ dil kī kitāb dekhtā huuñ

kitāb-e-zīst kā har safha saada hai 'nayyar'
qalam kī nok kā lafzoñ se rishta TuuT gayā

bārūd ke badle hāthoñ meñ aa jaa.e kitāb to achchhā ho
ai kaash hamārī āñkhoñ kā ikkīsvāñ ḳhvāb to achchhā ho

har saal kī āḳhirī shāmoñ meñ do chaar varaq uḌ jaate haiñ
ab aur na bikhre rishtoñ kī bosīda kitāb to achchhā ho

likhī huī hai jo dil kī zabāñ meñ dhaḌkan par
maiñ is kitāb ko tahrīr karne vaalā kaun

mujhe talāsh na kar tū ki ik zamāna huā
kitāb-e-ishq ke har baab se hazaf huuñ maiñ

biktī hai ab kitāb bhī cassette ke rate pe
kaise banegā 'ġhālib' o 'iqbāl' kā bajaT

baḌe qalaq kī baat hai ki tum ise na paḌh sake
hamārī zindagī to ik khulī huī kitāb thī

umr bhar ham sahejte the jise
ek ḳhasta kitāb jaisī thī

ek mushkil kitāb jaisī thī
zindagī ik azaab jaisī thī

kitāb-e-umr se sab harf uḌ ga.e mere
ki mujh asiir ko honā hai ham-kalām us kā

kahā ye maiñ ne zamīn par amn ho sakegā
kahā ki hāthoñ meñ alam rakhnā kitāb rakhnā

kisī harf meñ kisī baab meñ nahīñ aa.egā
tirā zikr merī kitāb meñ nahīñ aa.egā

maiñ us ke lafz lafz kī banāvaToñ meñ gum thā jab havā chalī
jo mere dil kī mez par kitāb thī khulī huī kidhar ga.ī