Tags-Kitab

kitāb-e-dil mujhe kaafī hai 'akbar' dars-e-hikmat ko
maiñ spencer se mustaġhnī huuñ mujh se mil nahīñ miltā

kabhī na dil ke sāgaroñ meñ tum utar sake magar
mire liye mirā vajūd ik khulī kitāb hai

dil mar miTā tilāvat-e-ruḳhsār-e-yār meñ
marhūm tiflagī se hī ahl-e-kitāb thā

vo husn kis qadar adab-āmoz thā 'zahīr'
qad ḳhāma-e-ravāñ thā to chehra kitāb thā

jaam girne lagā to bahkā shaiḳh
thāmnā thāmnā kitāb kitāb

guzre ta.alluqāt kā ab vāsta na de
gum ho chukī kitāb jo us kā pata na de

likh de ḳhushiyoñ se zindagī sab kī
'renū' ko vo qalam kitāb to de

ai 'ashk' ik kitāb paḌhī thī varaq varaq
vo tīrgī thī lafz koī sūjhtā na thā

kitāb-e-zīst se kuchh iqtibās tasvīreñ
ḳhushī ke lamhoñ meñ detīñ miThās tasvīreñ

gulāb-rut meñ ye zardiyoñ ke nuqūsh chehre pe dekh lenā
hamāre baare maiñ kuchh na kahnā pa ibratoñ kī kitāb likhnā

kitāb-e-dil kā mirī ek baab ho tum bhī
tumheñ bhī paḌhtā huuñ maiñ ik nisāb kī sūrat

are jise varaq-e-chehra-chehra yaad ho 'shāz'
bhalā vo aadmī daras-e-kitāb kyā letā

likh bayāz-e-marg meñ har jā anal-haq
aur kitāb-e-zīst meñ bāb-e-ḳhudā rakh

maiñ use harf harf paḌhtā gayā
vo agarche khulī kitāb na thā

unhoñ ne kitāb uThā.ī
aur galī meñ pheñk dī

kis tarah jamā kījiye ab apne aap ko
kāġhaz bikhar rahe haiñ purānī kitāb ke

abhī kitāb na chhīno tum in ke hāthoñ se
hamāre bachchoñ kā husn-o-jamāl mat chhīno

maiñ is galī se yahī soch kar guzartā huuñ
kitāb-e-zīst kā gum-gashta baab mil jaa.e

ik umr ho ga.ī hai ki dil kī kitāb meñ
kuchh ḳhushk pattiyoñ ke sivā kuchh nahīñ rahā

kho chukī saarī basīrat so chuke ahl-e-kitāb
āsmānoñ se koī taaza payām aayā to kyā