Tags-Kitab

ḳhvāhishoñ kī kitāb the jab the
zindagī kā nisāb the jab the

harf shaa.e na ho sake mere
vāris-e-sāhab-e-kitāb rahī

kitāb-e-zīst ko yakjā karūñ to kaise karūñ
ye baab kis ke liye hai vo baab kis ke liye

jahāñ meñ koī bhī ahl-e-nazar nahīñ miltā
agar karūñ bhī to chehra kitāb kis ke liye

kitāb-e-ishq haiñ lekin na itnī farsūda
ki be-paḌhe hī faqat mez par sajāo hameñ

jab kabhī kholī hai maiñ ne biite lamhoñ kī kitāb
der tak paḌhtā maiñ tahrīreñ purānī rah gayā

merā muqaddar haath meñ mere vaqt se mere rishte naate
jhūTī tasallī dene vaalī koī kitāb-e-fāl nahīñ maiñ

jahāñ zikr-e-mehr-o-vafā mile vahīñ 'indirā' kā qalam chale
ye kitāb-e-ishq meñ ho raqam ki fareb meñ bhī yaqīn ho

mujhe samajh ki maiñ hī asl rāz-e-kā.enāt huuñ
dharā huuñ tere sāmne khulī kitāb kī tarah

ajiib ḳhvāhish hai shahr vāloñ se chhup chhupā kar kitāb likkhūñ
tumhāre naam apnī zindagī kī kitāb kā intisāb likkhūñ

saada sā ik varaq huuñ kitāb-e-hayāt kā
hasrat se ab na ab koī armāñ hai kyā karūñ

tamām umr jo paḌhte rahe badan kī kitāb
jo kho ga.e haiñ sitāra-misāl harfoñ meñ

ḳhizāñ ke phuul sañjo.e kitāb meñ rakkhe
fasīl-e-ġham se yuuñ rishta bahāl rakkhā hai

bahut se log ki jo harf-āshnā bhī nahīñ
isī meñ ḳhush haiñ ki terī kitāb rakhte haiñ

ġham-qirtās pe apne karb kī bāteñ likhte rahnā
hijr-kitāb ko paḌhte rahnā sharheñ likhte rahnā

maiñ apnī hastī badal rahā huuñ
ye sab hisāb-o-kitāb kyā hai

kyā hī aurāq musavvar haiñ kitāb-e-dil ke
ḳhūn-e-armāñ se har ik safhe pe gul-kārī hai

tahqīq ho to jānūñ ki maiñ kyā huuñ qais kyā
likkhā huā hai yuuñ to sabhī kuchh kitāb meñ

jab mom kī battī na hī Dhabrī nazar aa.ī
ik puurī kitāb ik na.ī copy hī jalā.ī

asīr-e-umr ko aayā na ab tak
kitāb-e-hijr kā unvān rakhnā