kal raat vo jhagaḌtī rahī baat baat par
aur maiñ kitāb likhtā rahā kā.enāt par
kyā sochiye ki soch se aage hai zindagī
pahre lagā rakhe haiñ kisī ne hayāt par
kyā dāstāñ sunā.iye us ke visāl kī
kyā tabsira kare koī sahrā kī raat par
shāyad mirī anā mire lahje pe hai muhīt
shak ho rahā hai us ko mire iltifāt par
tere baġhair lagtā hai goyā ye zindagī
tanqīd kar rahī hai mirī ḳhvāhishāt par
phir us ne mirī ḳhū meñ mujhe qaid kar diyā
ik ḳhvāb sā lapeT diyā merī zaat par