Tags-Dil

is tarah to sar ma.arka-e-dār na hogā
chhānoge 'vafā' kūcha-e-dildār kahāñ tak

mumkin nahīñ ki terī mohabbat kī bū na ho
kāfir agar hazār baras dil meñ tū na ho

dil ko masal masal ke zarā haath sūñghiye
mumkin nahīñ ki ḳhūn-e-tamannā kī bū na ho

māshūq-e-hijr us se ziyāda koī nahīñ
kyā dil-lagī rahe jo tirī aarzū na ho

hai laag kā mazā dil-e-be-mudda.ā ke saath
tum kyā karo kisī ko agar aarzū na ho

pur-kaif ziyā.eñ hotī haiñ pur-nūr ujāle hote haiñ
jab ḳhāk-basar dil hotā hai aur arsh pe naale hote haiñ

kyā qahr barastā hai dil par sāvan kī shaboñ meñ kyā kahiye
kuchh dard kī phuvāreñ hotī haiñ kuchh yaas ke jhāle hote haiñ

in ujḌe hue armānoñ ko kis shauq se dil ne sīñchā thā
barbād magar hote haiñ vahī jo naam ke paale hote haiñ

dil tañg na ho ai rah-rav-e-ġham kāñToñ ke liye to kam se kam
mānind-e-naved-e-abr-e-karam ye paañv ke chhāle hote haiñ

lauh-e-har-zaḳhm pe tahrīr hai us kā mazmūn
naqsh hai har varaq-e-dil pe ibārat us kī

jism to merā thā dil us kā thā jaañ us kī thī
merī jāgīr thī chaltī thī hukūmat us kī

jo vārdātī sadāqatoñ kī alāmateñ haiñ hadīs-e-dil kī rivāyateñ haiñ
usī amānat ko jo hamesha sambhāltī hai sañvārtī hai vo shā.irī hai

din thakā hai bahut haiñ rāteñ shal
dil bhī chup hai khaḌī haiñ aaheñ shal

ehsās ke sūkhe patte bhī armānoñ kī chiñgārī bhī
ik dil siine meñ TuuTā sā aur fitrat meñ dildārī bhī

dil par khole uḌne ke liye uḌne kā magar imkān kahāñ
rokeñ pairoñ kī zanjīreñ pinjre kī chār-divārī bhī

behāl na ho yuuñ nādāñ dil har haal meñ jiinā hai lāzim
hai raste meñ āsānī bhī majbūrī bhī dushvārī bhī

raqsāñ hai muñDer par kabūtar
dīvār sī gir rahī hai dil par

ik karb sā ruuh par hai taarī
ik kaif sā chhā rahā hai dil par

uTh kar to aa ga.e haiñ tirī bazm se magar
kuchh dil hī jāntā hai ki kis dil se aa.e haiñ

tirā ġham samā gayā hai mire dil kī dhaḌkanoñ meñ
koī aish jab bhī aayā mire dil ne bad-duā dī