sab qatl ho ke tere muqābil se aa.e haiñ
ham log surḳh-rū haiñ ki manzil se aa.e haiñ
sham-e-nazar ḳhayāl ke anjum jigar ke daaġh
jitne charāġh haiñ tirī mahfil se aa.e haiñ
uTh kar to aa ga.e haiñ tirī bazm se magar
kuchh dil hī jāntā hai ki kis dil se aa.e haiñ
har ik qadam ajal thā har ik gaam zindagī
ham ghuum phir ke kūcha-e-qātil se aa.e haiñ
bād-e-ḳhizāñ kā shukr karo 'faiz' jis ke haath
naame kisī bahār-e-shimā.il se aa.e haiñ