Tags-But

labān-e-bosa-chashīda bhī ḳhuub haiñ lekin
nigah meñ ek but-e-nāḳhudā-e-bosa hai

Dhab pā.ūñ to maiñ us se kahūñ hāl-e-dil apnā
is but ko to ghere hue aġhyār khaḌe haiñ

az-bahr-e-ḳhudā baam par aa ai but-e-kāfir
kūche meñ tire tālib-e-dīdār khaḌe haiñ

shikva us but ke jafā kā jo kiyā maiñ to kahā
tum to duniyā meñ ho ik ahl-e-vafā tum ko kyā

sikka ravāñ hai kis but-e-mahshar-ḳhirām kā
naqsh-e-qadam nagīñ hai qayāmat ke naam kā

jaan kar us but kā ghar ka.aba ko sajda kar liyā
ai barahman mujh ko baitullāh ne dhokā diyā

ai 'fanā' dil sambhāl kar rakhnā
but nigāhoñ se vaar karte haiñ

phir jī meñ hai ki khā.iye koī nayā fareb
phir aa rahī hai ik but-e-va.ada-shikan kī yaad

ye jī meñ hai ki tirā but tarāsh kar barsoñ
tire huzūr khaḌe arz-e-mudda.ā kiije

but-e-ma.anī bhī ma.ānī ke pujārī bhī ga.e
aa ki ab ma.abad-e-alfāz meñ ḳhalvat hai bahut

zulf-e-kāfir-kesh lipTegī qadam se ai sanam
hindu-e-shab bhī karegā but-parastī ek din

zāhido puujā tumhārī ḳhuub hogī hashr meñ
but banā degī tumheñ ye haq-parastī ek din

ik baar gar vo dekhe tire ruḳh ko be-naqāb
ka.aba-parast hove vahīñ par but-e-farañg

ḳhudā maane hue ho ek but ko
karoge ab usī kī bandagī kyā

yaad us but kī namāzoñ meñ jo aa.ī mujh ko
tapish-e-shauq se har baar meñ baiThā uTThā

but-parastī to ham bhī karte haiñ
tark īmān kaun kartā hai

kaaTī jahāñ tasavvur-e-jānāñ meñ ek shab
kahte haiñ log us jagah but-ḳhāne ban ga.e

maiñ bhī sajda kar luuñ 'nāmī' lekin dil ko dhaḌkan hai
kyā ye vahī ka.aba to nahīñ jo kal tak thā but-ḳhāna bhī

tujh but kā huuñ maiñ barahman kartār kī saugand hai
japtā huuñ maalā yaar kī zunnār kī saugand hai

ham ko ye bhī ḳhabar nahīñ 'gulzār'
kab but-e-bevafā ne luuT liyā