Tags-Barg

tumhāre hijr ke mausam jinheñ mayassar huuñ
vo barg-o-bar kī bahāroñ ko mustarad kar deñ

paanī se sag-gazīda Dare jis tarah 'asad'
Dartā huuñ aa.ine se ki mardum-gazīda huuñ

lagtī hai qaus-e-quzah aariz pe shabnam
barg-e-gul jaise haiñ vo lab phuul kahiye

kyā baat hai gulzār hai kyuuñ barq se mahfūz
be-barg mirī shāḳh-e-nasheman to nahīñ hai

maiñ tere baaġh kā barg-e-ḳhizāñ-rasīda huuñ
tū vo kalī hai ki jis par bahār aaj bhī hai

shohra hai bahār-e-āriz kā bulbul kī tarah āshiq haiñ fidā
hai bāġh-e-javānī rūh-afzā barg-e-gul-e-tar hai partav-e-ruḳh

barg-e-gul aa maiñ tere bose luuñ
tujh meñ hai Dhañg yaar ke lab kā

shabnam nahīñ hai barg ke uupar chaman ke biich
'āsif' girā hai ashk kisī be-qarār kā

akelā peḌ hī mausam kā vaar sahtā rahā
shikasta-barg bhī koī na ās-pās huā

is baaġh meñ tū ai barg-e-hinā hañsne pe mire zaḳhmoñ ke na jā
rone meñ lahū ḳhandāñ hoñ kyā tū aur nahīñ maiñ aur nahīñ

harf ko barg-e-navā detā huuñ
yuuñ mire paas hunar kuchh bhī nahīñ

umr bhar kī sab kamā.ī luT ga.ī
ziist kā barg-o-navā jaatā rahā

maiñ ek barg-e-ḳhizāñ-dīda huuñ zamīn kā bojh
havā-e-dahr tire dosh par uḌā na gayā

sar-o-barg-e-ḳhushī ai gul-badan tujh bin kahāñ mujh ko
gulistān-e-dil aayā fauj-e-ġham kī pā.emālī meñ

harā-bharā thā chaman meñ shajar akelā thā
shajar pe barg bahut the samar akelā thā

na baaqī hai saaya na barg-o-samar haiñ
maiñ mausam kī sāzish kā maarā huā huuñ

ik ḳhāk-ba-sar barg huuñ Tahnī se judā huuñ
joḌegā mujhe kaun ki maiñ TuuT gayā huuñ

shā.irī kyā hai 'amīn-ashraf' navā-e-barg ne
ishq-nāma bhī ġhazal bhī āsmāñ mehrāb bhī

sar-e-barg-e-tamannā marham-e-dīdār kah jaa.eñ
na aa.eñ sāmne mere nigah-dārī ke mausam meñ