Tags-Barg

kaTī huī hai har ik shāḳh peḌ se 'mohsin'
lo barg-e-ḳhushk sī ab ke bikhar ga.ī duniyā

ham haiñ nairañgī-e-bahār ke rañg
naḳhl-o-barg-o-gul-o-samar haiñ ham

shahr-e-sānī meñ shajar-kārī na kī dānista
phir nikal aa.e kahīñ barg-o-samar meñ koī chiiz

har barg-e-shajar par ḳhush ho kar gulshan meñ nichhāvar karne ko
nik.hat kā ḳhazāna khol diyā himmat hai ye aalī phūloñ kī

ek muddat se koī sabz na ubhrā is meñ
ghoñsle chiil ke be-barg shajar meñ haiñ abhī

rāz-dār-e-gul-o-nasrīñ to hazāroñ the magar
koī samjhā hī nahīñ barg-e-pareshāñ kī zabāñ

sar se Tapkā jo shajar ke to zamīñ bhī na milī
ab ke ik barg-e-javāñ shāḳh se TuuTā aisā

bikhrī ho jaise chāñdnī barg-e-gulāb par
muskān us ke hoñToñ pe aaise paḌī rahe

ḳhush-naves aa ki tirā fan bhī mahak jā.egā
barg-e-sarsabz pe ik raat kī raanī likh de

ḳhizāñ to kyā nahīñ jis kī bahār ko bhī ḳhabar
ik aise baaġh ke andar hai barg-o-bār mirā

ek barg-e-be-shajar aur ik sadā-e-bāzgasht
donoñ āvāra phire haiñ kū-ba-kū merī tarah

jabr-o-istihsāl ke is ātishīñ sailāb meñ
bah ga.e insāniyat ke lahlahāte barg-o-bār

tez havā uḌā chale jis tarah barg-e-zard ko
us kī hañsī bhī apne saath merā savāl le ga.ī

harf ko barg-e-navā detā huuñ
yuuñ mire paas hunar kuchh bhī nahīñ

barg-o-gul titliyāñ salāmat sab
sar qalam ḳhushbuoñ ke kartā huuñ

paanī se sag-gazīda Dare jis tarah 'asad'
Dartā huuñ aa.ine se ki mardum-gazīda huuñ

mausam to har ik shāḳh ke khulne kā 'zafar' thā
phir un pe koī barg-o-samar kyuuñ nahīñ aayā

ye barg-o-bār kahāñ jāzib-nazar Thahre
tumhāre ba.ad to phūloñ se rañg-o-bū bhī ga.ī

santā huuñ ki hai ḳhvāhish-e-pā-bos use abhī
vo piis ke rakh deñ na kahīñ barg-e-hinā ko