us kī socheñ aur us kī guftugū merī tarah
vo sunahrā aadmī thā hū-ba-hū merī tarah
ek barg-e-be-shajar aur ik sadā-e-bāzgasht
donoñ āvāra phire haiñ kū-ba-kū merī tarah
chāñd taare ik diyā aur raat kā komal badan
sub.h-dam bikhre paḌe the chaar sū merī tarah
lutf āvegā bahut ai sākinān-e-qasr-e-nāz
be-dar-o-dīvār bhī rahiyo kabhū merī tarah
dekhnā phir lazzat-e-kaifiyyat-e-tishna-labī
toḌ de pahle sabhī jām-o-subū merī tarah
ik piyāda sar karegā saarā maidān-e-jadal
shart hai josh-e-junūñ aur justujū merī tarah