sahrā kā safar thā to shajar kyuuñ nahīñ aayā
māñgī thiiñ duā.eñ to asar kyuuñ nahīñ aayā
dekhā thā jise ham ne kabhī shauq-e-talab meñ
mahtāb sā vo chehra nazar kyuuñ nahīñ aayā
ham log to marte rahe qistoñ meñ hamesha
phir bhī hameñ jiine kā hunar kyuuñ nahīñ aayā
lagtā hai muqaddar meñ mire saaya nahīñ hai
muddat se safar meñ huuñ to ghar kyuuñ nahīñ aayā
jis ke liye baiThe the bichhā.e hue āñkheñ
mahfil meñ abhī tak vo bashar kyuuñ nahīñ aayā
mausam to har ik shāḳh ke khulne kā 'zafar' thā
phir un pe koī barg-o-samar kyuuñ nahīñ aayā