Tags-Sharab

maiñ shaad huuñ to zamāne meñ shādmānī hai
sharāb laao ki aalam tamām faanī hai

sharāb Dhaltī hai shīshe meñ phuul khilte haiñ
chale bhī aao ki ab donoñ vaqt milte haiñ

koī dast-e-hinā.ī mū-qalam se bhartā jaatā hai
nigār-e-shām meñ rañg-e-sharāb āhista āhista

'dā.ūd' apas suuñ hote behosh
āshiq kuuñ sharāb ḳhuub hai ḳhuub

jaam mai-e-alast siiñ be-ḳhud huuñ ai 'sirāj'
daur-e-sharāb-o-shīsha-e-pur-mul siiñ kyā ġharaz

dhīmā dhīmā sā nuur jaise tah-e-sāz
baḌhtā jaatā hai chhaTke tāroñ kā gudāz

hijr meñ ye sharāb hai tezāb
haath par aabla hai jaam nahīñ

raat ko mai-kade meñ kal thī kisī mast kī sadā
ek nazar kā rañg hai rañg-e-sharāb kuchh nahīñ

is kā chaskā ajiib chaskā hai
chhūTtī hī nahīñ sharāb-e-suḳhan

na jaane kyā hai ki merī hastī kisī kī āñkhoñ kā mai-kada hai
subū bhī maiñ huuñ huuñ maiñ hī saaqī ayāġh maiñ huuñ sharāb maiñ huuñ

tirī nazar sabab-e-tishnagī na ban jaa.e
kahīñ sharāb mirī zindagī na ban jaa.e

riñd-e-muflis ko de hai zyaad sharāb
bhaa.ī mujh ko tirī ye ḳhū saaqī

tire suḳhan meñ ai nāseh nahīñ hai kaifiyyat
zabān-e-qulqul-e-mīnā siiñ sun kalām-e-sharāb

kis qadar huuñ banā havā meñ bhī
jaise maiñ ne sharāb pī hī nahīñ

sharāb pī jaan tan meñ aa.ī alam se thā dil kabāb kaisā
gale se lag jaao aao sāhab kahāñ kā parda hijāb kaisā

bahār ke din haiñ kyā maza hai sharāb kā daur chal rahā hai
lagā hai sabza chaman khulā hai baras rahā hai sahāb kaisā

dekhā kiye vo mast nigāhoñ se baar baar
jab tak sharāb aa.ī ka.ī daur ho ga.e

kal mai-kade meñ baġhair saaqī
auñdhā qadah-e-sharāb dekhā

karoge kaise 'ḳhalish' apnī be-kalī kā ilaaj
sharāb meñ bhī nahīñ hai ḳhumār ab ke baras

tū mast kar sharāb se ai gul-badan mujhe
zālim maiñ terī chashm-e-gulābī se mast huuñ