Tags-Sharab

vaa.iz na tum piyo na kisī ko pilā sako
kyā baat hai tumhārī sharāb-e-tahūr kī

zindān-e-bazm-e-shauq meñ aise bhī riñd haiñ
tishna rahe jo pī ke samundar sharāb ke

zindagī mahfil-e-shab kī thī pas-andāz-e-sharāb
piine baiThe to bas ik ghūñT zarā sā niklā

milā na jām-e-sharāb 'sāqī' koī qadah bañg kā atā ho
hamāre pīr-e-muġhāñ ḳhizar haiñ subū meñ sabzī bhī to chhanī hai

pilā kar phir sharāb-e-husn-o-jalva
mujhe be-ḳhud banāyā jā rahā hai

zāhid umīd-e-rahmat-e-haq aur hajv-e-mai
pahle sharāb pī ke gunāh-gār bhī to ho

merā kashkol kab se ḳhālī thā
maiñ ne is meñ sharāb bhar lī hai

tujh bin jagah sharāb kī piite the dam-ba-dam
piyāle siiñ gul ke ḳhuun jigar kā chaman meñ ham

ġham-e-firāq kī be-kaifiyāñ ḳhudā kī panāh
sharāb meñ bhī to kaifiyyat-e-sharāb nahīñ

ḳhalvat ho aur sharāb ho ma.ashūq sāmne
zāhid tujhe qasam hai jo tū ho to kyā kare

mastoñ meñ phuuT paḌ ga.ī aate hī yaar ke
laḌtā hai aaj shīshe se shīsha sharāb kā

aatī thī pahle dil se kabhī bū kabāb kī
raushan hai ab to siine meñ bhaTTī sharāb kī

talḳhī kā naza.a kī to kuchh ehsās ho sake
itnī to mere muñh meñ ho talḳhī sharāb kī

mai se kahīñ sivā hai pas-e-tauba mai-kasho
aa jaa.e duur hī se kahīñ bū sharāb kī

jannat ke ḳhvāb dekh ke aatī haiñ ham ko yaad
rindāna sohbateñ vo kabāb-o-shabāb kī

kyuuñ hashr meñ ho fikr azāb-o-savāb kī
sohbat hai ye bhī ek sharāb-o-kabāb kī

ye dekhnā hai hameñ kis kā zauq kaisā hai
yahāñ sharāb bhī hai zahr ke gilās bhī haiñ

abhī mohabbat kī ibtidā hai diloñ ke armāñ nikal rahe haiñ
abhī hai āġhāz mastiyoñ kā sharāb ke daur chal rahe haiñ

reg huuñ chāhiye dariyā-e-sharāb
mai-kade par na qanā.at hogī

ḳhud ko sambhālnā yahāñ mushkil hai dosto
chhalkī huī sharāb na do maiñ nashe meñ huuñ