letā hai jaan merī to meñ sar-ba-dast huuñ
ai yaar maiñ to kushta-e-roz-e-alast huuñ
ik dam kī zindagī ke liye mat uThā mujhe
ai be-ḳhabar maiñ naqsh-e-zamīñ kī nishast huuñ
tū mast kar sharāb se ai gul-badan mujhe
zālim maiñ terī chashm-e-gulābī se mast huuñ
dūr-az-tarīq mujh ko samajhiyo na zāhidā
gar tū ḳhudā-parast hai maiñ but-parast huuñ
in sañg-dil butoñ kā gila kyā karūñ 'nazīr'
maiñ aap apne shīsha-e-dil kī shikast huuñ