Tags-Andhera

miTTī ke gharauñde meñ sitāroñ ke diye haiñ
āñgan meñ añdherā na ujālā na havā hai

kabhī kabhī to añdherā bhī ḳhūb-sūrat hai
tirā ḳhayāl kahīñ raushnī na ban jaa.e

ye aur baat ki dil meñ ghanā añdherā hai
magar zabān se to chāñdnī luTāyā kar

raat masjid meñ añdherā to bahut thā lekin
yaad bhūlī sī koī rāh-e-ibādat thī mujhe

apne māhaul meñ kyuuñ añdherā kareñ
der tak dekh kar raushnī kī taraf

añdherā 'hafīz' ho rahā hai
bujhtā hai charāġh zindagī kā

ik musalsal gard meñ Duube hue sab bām-o-dar
jis taraf dekho añdherā jis taraf dekho khañDar

ik kāfir-e-mutlaq hai zulmat kī javānī bhī
be-rahm añdherā hai sham.eñ haiñ na parvāne

shab guzar kar bhī añdherā kam nahīñ
us kī zulfeñ to kahīñ barham nahīñ

āñkhoñ se nikal gayā añdherā
taare se palak pe jagmagā.e

ye koī aur hai terī taraf saraktā huā
añdherā hote hī jo mujh meñ aa samāyā hai

naqāb us ne ruḳh-e-husn-e-zar pe Daal diyā
ki jaise shab kā añdherā sahar pe Daal diyā

chār-sū hai añdherā āñkhoñ meñ
chaar din se jo us kī diid nahīñ

hamārī nākāmī-e-vafā ne zamāne kī khol dī haiñ āñkheñ
charāġh kab kā bujhā paḌā hai magar añdherā kahīñ nahīñ hai

huā jo ik dil kā daaġh raushan to ho ga.e kul charāġh raushan
ḳhayāl raushan dimāġh raushan bas ab añdherā kahīñ nahīñ hai

kisī meñ himmat na thī ki baḌh kar junūñ kī zanjīr thaam letā
ḳhirad kī bastī meñ hai añdherā charāġh sahrā meñ jal rahā hai

ai nigāh-e-dost ye kyā ho gayā kyā kar diyā
pahle pahle raushnī dī phir añdherā kar diyā

hazār sham.a farozāñ ho raushnī ke liye
nazar nahīñ to añdherā hai aadmī ke liye