Tags-Andhera

bajā ki roz añdherā mujhe nigaltā hai
maiñ roz ik nayā ḳhurshīd ban ke uThtā huuñ

detī hai yahī vaqt kī tauret gavāhī
zar kā jo ujālā hai vo hai zar kā añdherā

kyā kyā na abul-haul tarāshe ga.e us se
jaise ye añdherā bhī ho patthar kā añdherā

vo hukm ki hai aql-o-aqīde pe muqaddam
chhuTne hī nahīñ detā muqaddar kā añdherā

kuchh ruashnī-e-tab.a zarūrī hai vagarna
hāthoñ meñ utar aatā hai ye sar kā añdherā

vaise to bahut dhoyā gayā ghar kā añdherā
niklā nahīñ dīvār ke andar kā añdherā

har aañkh lagī hai ufuq-e-dār kī jānib
sūraj se kiran māñgtā hai Dar kā añdherā

itnā gahrā hai añdherā mujh meñ
paañv rakhte hue Dar lagtā hai

kisī meñ himmat na thī ki baḌh kar junūñ kī zanjīr thaam letā
ḳhirad kī bastī meñ hai añdherā charāġh sahrā meñ jal rahā hai

maiñ āñsuoñ meñ nahāyā huā khaḌā huuñ abhī
janam janam kā añdherā bulā rahā hai mujhe

phir to har samt añdherā hī añdherā hogā
pau phaTī hai to luTī bazm charāġhāñ kar leñ

tū nanhā-munnā ek diyā maiñ ek samundar añdhiyārā
tū jalte jalte bujhne lagā aur phir bhī añdherā ghar meñ hai

dil jalāne se kahāñ duur añdherā hogā
raat ye vo hai ki mushkil se saverā hogā

sham.a raushan hai sar-e-bazm nigāhoñ meñ magar
kis ko mālūm dabe paañv añdherā aayā

mujhe jalnā paḌā majbūr ho kar
añdherā is qadar gahrā gayā thā

hai añdherā to samajhtā huuñ shab-e-gesū hai
band āñkheñ haiñ ki ai yaar nazar meñ tū hai

dar-o-dīvār pe paḌhtā rahūñ nauha kal kā
is ujāle se to behtar hai añdherā kar do

bas ek baar use raushnī meñ dekhā thā
phir is ke ba.ad añdherā bahut añdherā thā

mere raste meñ jo raunaq thī mere fan kī thī
mere ghar meñ jo añdherā thā merā apnā thā

rāsta nahīñ miltā
munjamid añdherā hai