Tags-Andhera

kūcha-e-zulf nit añdherā hai
vahāñ siyah-baḳht dil kā Derā hai

ye jo añdherā phail rahā hai jism-o-jāñ ke biich
aur ghanerā ho jaa.e to diyā jalā.ūñgā

vo añdherā hai ki bujhtī huī āñkheñ mujh se
pūchhtī haiñ ki vo aa.egā saverā hogā

andar kā zahr-nāk añdherā hī thā bahut
sar par tulī khaḌī hai shab-e-tār kis liye

'jamshed' kyā karoge agar yuuñ bhī ho kabhī
sūraj ke dā.ere se añdherā tulūa ho

añdherā bahut aur lambā safar hai
hai manzil kahāñ rahnumā jāntā hai

thā añdherā har taraf
raah bhī miltī na thī

añdherā ho gayā hai shahr bhar meñ
koī dil jalte jalte bujh gayā kyā

is vaqt to yuuñ lagtā hai ab kuchh bhī nahīñ hai
mahtāb na sūraj, na añdherā na saverā

us ke raushan mukhḌe par ye bikhrī bikhrī kaalī zulfeñ
jaise jag ke ujiyāroñ par chhā.e ghor añdherā baabā

hamesha kī tarah sar ko jhukāyā us kī ḳhvāhish par
añdherā ḳhud liyā us ke liye mahtāb uThā laa.ī

chhā rahā hai saarī bastī meñ añdherā
raushnī ko, ghar jalānā chāhtā huuñ

hamārī nākāmī-e-vafā ne zamāne kī khol dī haiñ āñkheñ
charāġh kab kā bujhā paḌā hai magar añdherā kahīñ nahīñ hai

huā jo ik dil kā daaġh raushan to ho ga.e kul charāġh raushan
ḳhayāl raushan dimāġh raushan bas ab añdherā kahīñ nahīñ hai

in sā.atoñ ko sub.h kaheñ bhī to kis tarah
sūraj ugā huā thā añdherā chhaTā na thā

shaam ke ba.ad añdherā nahīñ rahtā ghar meñ
ek sūraj nikal aatā hai sahar se pahle

añdherā hī añdherā har taraf hai
charāġh-e-dil kahāñ tak ham jalā.eñ

kabhī kabhī to añdherā bhī ḳhūb-sūrat hai
tirā ḳhayāl kahīñ raushnī na ban jaa.e

na.ī sahar hai ye logo nayā saverā hai
tulūa ho chukā sūraj magar añdherā hai

abhī na de mujhe āvāz ai ġham-e-jānāñ
abhī to shahr-e-vafā meñ baḌā añdherā hai