Tags-Paan

tai huā nazm hī mustaqbil hai pān-sau bil hai bha.ī pyāro
aañkh na maaro ġhazal hamāre hasab-nasab kā hissa hai

paan khāne kī adā ye hai to ik aalam ko
ḳhuuñ rulā.egā mirī jaañ dahan-e-surkh tirā

huī zabāñ laal tire haath se khā ke biiḌā
kyā fusūñ paḌh ke khilāyā thā mujhe paan ke biich

ġhairoñ ko apne haath se hañs kar khilā diyā
mujh se kabīda ho ke kahā paan lījiye

ḳhūn-e-ushshāq hai ma.ānī meñ
shauq se paan khā.iye sāhab

mire qatl par tum ne biiḌā uThāyā
mire haath kā paan khāyā to hotā

vo aag lagī paan chabā.e se kasū kī
ab tak nahīñ bujhtī hai bujhā.e se kasū kī

lab us ke dekho to hai zulm-o-ḳhūñ ḳhurī kī dalīl
siyah misī pe nahīñ surḳh paan kī tahrīr

saath za.iif baap ke lag ga.iiñ kām-kāj par
gahne chhupā ke laḌkiyāñ daadī ke pān-dān meñ

sulh in donoñ kī āḳhir meñ karā.ī maiñ ne
paan meñ Daal ke tambākū bhī khaa.ī maiñ ne

paan kahne lagā cigarette se ki iblīs-e-laīñ
terī tambākū se jaatī hai badan meñ nicotine

paan bolā ki jalātā hai tū kyuuñ qalb-o-jigar
eshiyā.ī maiñ huuñ, maġhrib kā hai tū saudāgar

is pe cigarette ne kahā paan se ye kyā hai sitam
chhāñv meñ paltā hai aur tū hai baḌā sabz qadam

cigarette se jo sune paan ne ye talḳh suḳhan
bolā ḳhāmosh ki achchhā nahīñ hāsid kā chalan

cigarette ne ye ik paan ke biiḌe se kahā
tū hamesha se parī-rūoñ ke jhurmuT meñ rahā

jabhī tū paan khā kar muskurāyā
tabhī dil khil gayā gul kī kalī kā

jabhī tū paan khā kar muskurāyā
tabhī dil khil gayā gul kī kalī kā

shauq hai lekin ḳhilāf-e-vaza.a apnī jaan kar
mol le kar ḳhud kabhī khāte nahīñ ik paan shaiḳh

diyā khā ke aap ne paan jo dil-e-mubtalā huā surḳh-rū
use samjhā peT kā bojh vo jo tumhāre muñh kā ugaal thā

jo amrit chhoḌ kar ham log bhī vish-pān kar lete
to apne ḳhuun meñ ye saañp lahrāyā nahīñ hotā