Tags-Mazdoor

ye mazdūr ye aam tājir ye modī
sabhī sāda-lauhoñ kī kashtī Dubo dī

kaal aur qaht kī sejoñ ko sajātī nahīñ maiñ
ḳhuun mazdūr kā galiyoñ meñ bahātī nahīñ maiñ

jā pahuñche mazdūr gharoñ meñ
ḳhush ḳhush haiñ biivī bachchoñ meñ

vo jā rahī haiñ saroñ pe patthar
uThā.e mazdūr aurteñ kuchh

ye parinde bhī khetoñ ke mazdūr haiñ
lauT ke apne ghar shaam tak jā.eñge

husn kī shart-e-vafā jo Thahrī tesha o sañg-e-girāñ kī baat
ham hoñ yā farhād ho āḳhir āshiq to mazdūr rahā

ilm mazdūr ko fankār banā detā hai
ilm mansūr ko hoshiyār banā detā hai

raushan hai daraḳhshāñ hai ye daur ba-zāhir to
mazdūr ke bas meñ to bas riiḌh kī haDDī hai

dhuup meñ paanī meñ sardī meñ havā ke saath saath
jaan apnī de rahā hai aaj bhī mazdūr kyuuñ

husn kī shart-e-vafā jo Thahrī tesha o sañg-e-girāñ kī baat
ham hoñ yā farhād ho āḳhir āshiq to mazdūr rahā

kuchal kuchal ke na fōt-pāth ko chalo itnā
yahāñ pe raat ko mazdūr ḳhvāb dekhte haiñ

nigāheñ muntazir the haath ḳhālī
phir ik mazdūr kaise ghar gayā thā

to mashaqqat ke circle se venus kā mazdūr thakne lagā
in havāoñ meñ uḌte hoī sab parinde ḳhalāoñ meñ gum ho ga.e

ba.az aise the jo sarmā.e ke Thekedār the
kahte the mazdūr ko ḳhar aur ḳhud ḳhar-kār the

ye may kī pahlī, din hai banda-e-mazdūr kā
muddatoñ ke ba.ad dekhā is ne jalva huur kā

maiñ ik mazdūr huuñ roTī kī ḳhātir bojh uThātā huuñ
mirī qismat hai bār-e-hukmarānī pusht par rakhnā

jannat ke liye shaiḳh jo kartā hai ibādat
kī ġhaur jo ḳhātir meñ to mazdūr kī sūjhī

ujrat-e-ishq vafā hai to ham aise mazdūr
kuchh bhī kar leñge ye mehnat nahīñ hogī ham se

kis kī sūrat meñ nahīñ jalva-e-ḳhūn-e-mazdūr
ḳhūn-e-mazdūr kī qīmat bhī adā kaise ho

mazdūr haiñ ham, mazdūr haiñ ham, majbūr the ham, majbūr haiñ ham
insāniyat ke siine meñ ristā huā ik nāsūr haiñ ham