ajnabī Daal na yuuñ mujh par hiqārat kī nazar
maiñ tirī chāhne vaalī huuñ zarā der Thahar
chand sikkoñ pe huā kartā hai har shab ko nisār
mere siine kā gudāz aur javānī kī bahār
jitnā nāpāk hai tan utnā mirā man to nahīñ
kyuuñ ThiThaktā hai jhijaktā hai maiñ nāgan to nahīñ
ye vo dar hai jahāñ mohtāj-o-ġhanī aate haiñ
naam kis kis kā maiñ ab luuñ ki sabhī aate haiñ
vo javāñ jin kī ragoñ meñ hai baġhāvat raqsāñ
jin ke chehroñ pe hai nākāmī-e-ulfat kā dhuāñ
zindagī-bhar jo mashīnoñ ko lahū dete haiñ
aa ke kuchh der mirī bazm meñ hañs lete haiñ
kitne rishiyoñ kī kuTī meñ mire kāshāne haiñ
kitne durveshoñ ke lab par mire afsāne haiñ
jo mirī bazm meñ hai vo mirā shaidā.ī hai
koī hindū hai na muslim hai na īsā.ī hai
kaal aur qaht kī sejoñ ko sajātī nahīñ maiñ
ḳhuun mazdūr kā galiyoñ meñ bahātī nahīñ maiñ
ahl-e-mahfil ko rulānā nahīñ aatā mujh ko
tex par tex lagānā nahīñ aatā mujh ko
maiñ huuñ ik jhuuT kā bāzār ye maanā maiñ ne
mere ġhamze bhī haiñ talvār ye maanā maiñ ne
sab jatan haiñ ye magar ik Dil-e-pur-ġham ke liye
jam.a kartī nahīñ daulat ko maiñ atom ke liye
merā manshā nahīñ aqvām-e-zubūñ kī tasḳhīr
merā maqsad nahīñ pahnā.ūñ ḳhirad ko zanjīr
maiñ ne ġhalle ko godāmoñ meñ chhupāyā hai kabhī
maiñ ne dollar ke liye haath baḌhāyā hai kabhī
mujh ko sarmā.e ke sho.ale ne jalā Daalā hai
merī ismat ke charāġhoñ ko bujhā Daalā hai
mujh meñ mariyam kā taqaddus thā to siitā kā vaqār
kar diyā zar ne mujhe raunaq-e-husn-e-bāzār
ḳhair tū in mirī bātoñ pe koī dhyān na kar
mā-sivā mere kisī kā kabhī armān na kar
mere siine meñ jo sho.ala hai na so jaa.e kahīñ
ajnabī Dar hai mujhe sub.h na ho jaa.e kahīñ