Tags-Mazdoor

jab kisānoñ kī nigāhoñ se Tapaktā hai hirās
phūTne lagtī hai jab mazdūr ke zaḳhmoñ se yaas

aaj se ai mazdūr kisāno mere giit tumhāre haiñ
fāqa-kash insāno mere jog-bahāg tumhāre haiñ

qasr-e-tan bigḌā kisī kā gorkan kī ban paḌī
ghar kisī kā gir paḌā ghar bin gayā mazdūr kā

itnī jaldī mazdūr aurat āḳhir ye gale meñ bāñheñ kyuuñ
le der huī ab bhaag bhī jā bas itnī mohabbat kaafī hai

ta.amīr-o-taraqqī vaale haiñ kahiye bhī to un ko kyā kahiye
jo shīsh-mahal meñ baiThe hue mazdūr kī bāteñ karte haiñ

zamām-e-kār agar mazdūr ke hāthoñ meñ ho phir kyā
tarīq-e-koh-kan meñ bhī vahī hiile haiñ parvezī

terī tābish se raushan haiñ gul bhī aur vīrāne bhī
kyā tū bhī is hañstī-gātī duniyā kā mazdūr hai chāñd?

merī zabāñ par maslahatoñ ke pahre haiñ to phir kyā hai
haq ke alam-bardār haiñ ab bhī mazdūr o dahqān mire

haa.e vo mazdūr jis ke paa.e himmat par nisār
sañg-dil sarmāya-dārī kā sar-e-nā-pā.edār

mun.im ko us nivāle kī lazzat kā kyā patā
mazdūr jo kamā.e pasīna nikāl ke

ik mulāqāt ke Talne kī ḳhabar aise lagī
jaise mazdūr ko haḌtāl kī afvāh mile

manzar-e-ām pe aate hī payām-e-mazdūr
satvat-e-shāhī ke farmān badal jaate haiñ

jab kabhī biktā hai bāzār meñ mazdūr kā gosht
shāh-rāhoñ pe ġharīboñ kā lahū bahtā hai

gar tire shahr meñ aa.e haiñ to ma.azūr haiñ ham
vaqt kā bojh uThā.e hue mazdūr haiñ ham

vaqt mazdūr hai ujrat diije
ek ik lamhe kī qīmat diije

maiñ ne 'anvar' is liye bāñdhī kalā.ī par ghaḌī
vaqt pūchheñge ka.ī mazdūr bhī raste ke biich

daadī se kahnā us kī kahānī sunā.iye
jo bādshāh ishq meñ mazdūr ho gayā

ba-īñ rindī 'majāz' ik shā.er-e-mazdūr-o-dahqāñ hai
agar shahroñ meñ vo bad-nām hai bad-nām rahne de

jab pasīne kā ḳharīdār na ho tab mazdūr
shaam ko nazreñ jhukā.e hue ghar jaate haiñ

zindagī ab is qadar saffāk ho jā.egī kyā
bhuuk hī mazdūr kī ḳhūrāk ho jā.egī kyā