Akram Jazib

baiTha hun apni zat ka naqsha nikal ke

Akram Jazib

Mandi Bahauddin, Punjab, Pakistan

1972
baiThā huuñ apnī zaat kā naqsha nikāl ke
ik be-zamīn haarī huuñ sahrā nikāl ke
DhūñDā bahut magar koī rasta nahīñ milā
is zindagī se terā havāla nikāl ke
almārī se mile mujhe pahle pahal ke ḳhat
baiThā huā huuñ aap kā va.ada nikāl ke
vīrāniyoñ pe aañkh chhamā-chham baras paḌī
laayā huuñ maiñ to dasht se dariyā nikāl ke
āsāniyāñ hī sochte rahte haiñ yaar log
uqbā nikāl kar kabhī duniyā nikāl ke
ham raftagāñ se haT ke bhī dekheñ to sher meñ
mauzūa kam hī bachte haiñ nauha nikāl ke
milnā kahāñ thā sahal dar-e-āgahī mujhe
aayā huuñ maiñ pahāḌ se rasta nikāl ke
vaa.iz nihāl aaj ḳhushī se hai kis qadar
ik taaza iḳhtilāf kā nukta nikāl ke
mun.im ko us nivāle kī lazzat kā kyā patā
mazdūr jo kamā.e pasīna nikāl ke
hālāt kyā ġharīb ke badle ki har koī
le aayā hai qarīb kā rishta nikāl ke
'jāzib' kahāñ ḳhabar thī ki hai baaz taak meñ
ham shaad the qafas se parinda nikāl ke
Top Urdushayar.com