Tags-Ada

maan le ab bhī mirī jān-e-adā dard na chun
kaam aatī nahīñ phir koī duā dard na chun

aatī hai us kī bū sī mujhe yāsman meñ aaj
dekhī thī jo adā ki sajan ke badan meñ ham

ham se āzurda hai tabassum-e-dost
isī husn-e-adā kī baat kareñ

zulf o ruḳhsār ke tasavvur meñ
husn o nāz-o-adā kī baat kareñ

mirī be-ḳhudī par nazar kyā ho us ko
vo ḳhud mahv-e-nāz-o-adā ho rahā hai

maiñ hazār bātoñ meñ ek bhī kabhī un se khul ke na kah sakā
agar ek tarah kī baat ho to hazār tarah adā karūñ

garāñ zamīn-e-kisht-e-ġham-e-jigar ko naqd kī adā
masarratoñ kā vahm thā udhār kar liyā gayā

kis ne mausam ko sikhlā.ī aisī adā
kabhī ḳhush aur kabhī ye ḳhafā sā lage

vo but-e-shīrīñ-adā kartā hai mujh ko sañgsār
ye shakar-pāre baraste haiñ junūñ patthar nahīñ

haq agar koī numū kā thā to vo us ne adā
kar diyā hai bādaloñ se ābyārī bāñdh kar

ye ḳhushbū lamhe aur ye ḳhush-adā log
bichhaḌ kar yaad aane ke liye haiñ

vo aayā 'akbar' is adā se aaj mere sāmne
ki ik jhalak sī ḳhvāb kī dikhā dikhā ke chal diyā

uḌ ke jo pahuñchī sabā ke saath galiyoñ meñ tirī
musht-e-ḳhāk-e-kushta-e-teġh-e-adā thī maiñ na thā

ik jhalak dikhlā ke apnī kis adā se kah gayā
jis ko dekhā vo bhī shān-e-kibriyā thī maiñ na thā

badan ko rauñdne vaalo zamīr zinda hai
jo haq kī pūchh rahe ho to haq adā na huā

muskurāne kī adā jaise chamak bijlī kī
aan hañsne kī qayāmat lab-o-dandān parī

adā hoñge hamārī be-bahā lā-hāsilī meñ
vo saare qarz jo is jaan par rakkhe ga.e haiñ

dard ne dil kī parvarish kī hai
dard hī sher se adā hogā

yuuñ to haiñ mashāhīr-e-suḳhan shohra-e-āfāq
'barqī' kī alag tarz-e-adā aur hī kuchh hai

mire mizāj meñ āshuftagī sabā kī hai
milī kalī kī adā gul kī tamkanat tum ko