Tags-Ada

adā huā na qarz aur vajūd ḳhatm ho gayā
maiñ zindagī kā dete dete suud ḳhatm ho gayā

koī sauġhāt-e-vafā de ke chalā jā.ūñgā
tujh ko jiine kī adā de ke chalā jā.ūñgā

vo bigaḌnā vasl kī raat kā vo na mānñā kisī baat kā
vo nahīñ nahīñ kī har aan adā tumheñ yaad ho ki na yaad ho

go sudh nahīñ us shoḳh sitamgar ne sambhālī
tis par bhī koī baat adā se nahīñ ḳhālī

bikhar rahī hai ḳhayāloñ meñ ḳhvāb kī ḳhushbū
vajūd ban ke kahāñ koī ḳhush-adā chamkā

adā ne chheḌā nazar ne taakā sitam ne luuTā ġhazab ne maarā
zabān jab se khulī hamārī yahī kahānī hai aur ham haiñ

kuchh is adā se aa ke milā ham se 'ashk' vo
āñkhoñ meñ jazb ho ke sarāpā hī rah gayā

sohbat-e-hūr se huī nafrat
maiñ jo terī adā kā ḳhūgar thā

majnūñ jo ban gayā kisī lailā-adā kā maiñ
phir kyā thā najd ḳhud mirā vīrāna ho gayā

maiñ farefta tere naaz par maiñ nisār tere niyāz par
tirī har adā meñ fareb thā mujhe jis kī be-ḳhabarī rahī

vo ḳhush-adā hai bahut log mujh se kahte haiñ
magar ye baat guzartī hai nāgavār mujhe

'fā.ez' us ḳhush-adā sirījan paas
be-gunāhāñ kā qatl baazī hai

ayaañ bhī honā hai lekin nihāñ bhī rahnā hai
so ġhā.ebāna adā ko varūd sauñptā huuñ

bikhar bikhar ga.e alfāz se adā na hue
ye zamzame jo kisī dard kī davā na hue

saj-dhaj nigah akaḌ chhab husn-o-adā-o-shoḳhī
nām-e-ḳhudā haiñ tujh meñ ai naujavān āThoñ

qatl to nahīñ badlā qatl kī adā badlī
tiir kī jagah qātil saaz uThā.e baiThā hai

ye kyā yaqīñ ki samajh legā har ishāra vo
laboñ kā farz nigāhoñ se kyuuñ adā kiije

mahsūs kareñ sab hī bayāñ ho na kisī se
us saada o ma.asūm meñ kuchh aisī adā hai

ham to tamām umr tirī hī adā rahe
ye kyā huā ki phir bhī hamīñ bevafā rahe

maiñ jis ke sehr se koh-e-nidā tak aa pahuñchā
vo harf abhī mire lab se adā huā bhī nahīñ