Tags-Ada

kuchh is adā se maiñ khoyā gayā mohabbat meñ
zamāna biit gayā hai bajā havās nahīñ

shoḳhī shabāb husn tabassum hayā ke saath
dil le liyā hai aap ne kis kis adā ke saath

ye dil kī baat hī muñh se adā nahīñ hotī
maiñ kyā kahūñ ki yahāñ baar baar kyuuñ aayā

phir bhī paanī kī mujhe qīmat adā karnī paḌī
mere lab par tishnagī kā zā.iqa honā hī thā

bhalā kahāñ kise mumkin hai ye adā har baar
charāġh rakhtā hai lau par dam-e-havā har baar

tirī adā meñ hai inkār bhī ijāzat bhī
jo ham mileñge to duurī na qurbateñ hoñgī

adā o naaz suuñ aatā hai vo raushan-jabīñ ghar suuñ
ki jyuuñ mashriq suuñ nikle āftāb āhista āhista

ye kaisī jafā.eñ hotī haiñ ye kaisī adā hai un kī 'fanā'
ham husn kā parda rakhte haiñ vo ishq kā da.avā karte haiñ

bas ek jalva-e-rañgīnī-e-adā ke liye
ye chashm-e-shauq mirī be-qarār aaj bhī hai

nazroñ meñ na be-mehrī kī adā bātoñ meñ na vo ḳhushbu-e-vafā
kitne hī diloñ ko toḌ ga.ī zālim kī jabīñ kī be-shikanī

yahī kahtī lailī-e-soḳhta-jāñ nahīñ khātī adab se ḳhudā kī qasam
ġham-e-qais sivā mujhe ġham nahīñ kuchh usī kushta-e-nāz-o-adā kī qasam

vo jumbish apne laboñ ko na de ye baat alag
adā adā se magar baat karnā chāhtā hai

jo tire dil ko lubhā.e vo adā mujh meñ nahīñ
kyuuñ na tujh ko koī terī hī adā pesh karūñ

nazr-e-jāñ bhī pesh kī to muskurā ke pheñk dī
apne sar se zindagī kā qarz adā kaise ho

vo vafā thī yā jafā achchhī lagī
ham ko terī har adā achchhī lagī

ḳhanda-e-zer-e-lab bhī hai giryā-e-be-sabab bhī hai
be-hamā-o-bahar-e-adā rañg jamā rahe ho tum

ġhamze ne le ke dil ko adā ke kiyā supurd
ġhamze se dil ko leñ ki adā se talab kareñ

kahnā adā ko teġh ḳhushāmad kī baat hai
siine ko apnī us kī samajhnā sipar ġhalat

adā se dekh lo jaatā rahe gila dil kā
bas ik nigāh pe Thahrā hai faisla dil kā

matā-e-sabr-o-sukūñ jis ne dil se chhīn liyā
vo dil-navāz adā-āshkār bhī to nahīñ