Tags-Gham

jinheñ 'sājid' ġham-e-ā.indagāñ hai
surūd-e-shām-e-rafta kyā suneñge

zabt to asl hai mohabbat kī
ġham jatāne ke ba.ad kaisā ishq

kar diyā faash tirā ġham le kar
rāz-e-ejāz-e-masīhā ham ne

jo ranj-o-ġham meñ mire saath saath thā ab tak
use bhī merī ḳhushī se malāl hone lagā

giraftārī kī lazzat aur nirā āzād kyā jaane
ḳhushī se kāTnā ġham kā dil-e-nāshād kyā jaane

kyā phūTtā hai dil kī zamīñ se ba-rañg-e-ġham
kyā tairtā hai aañkh meñ naqsh-e-bahār sā

'ishrat' udaas taaq pe ye zard-rū charāġh
tanhā.iyoñ meñ merī hai ik ġham-gusār sā

ġham-zado!!! charāġh āñkhoñ ko sauñp do
ki aañsū sirf charāġh rotā hai

ġham-e-ulfat ġham-e-duniyā ġham-e-dīñ
uThā.e baar kyā kyā nā-tavāñ dil

sar-barahna huuñ to kyā ġham hai ki ab shahr meñ log
barguzīda hue dastār-e-fazīlat ke baġhair

dil ke nagar meñ chaar taraf jab ġham kī duhā.ī baiTh ga.ī
sar pe hamāre dast-e-qazā se teġh-e-judā.ī baiTh ga.ī

sun ke adā-e-ġham kī tere sabr-o-shakeb haiñ bhāgne par
paañv Thaharne mushkil haiñ jab dhaak parā.ī baiTh ga.ī

shām-e-ġham yaad nahīñ sub.h-e-tarab yaad nahīñ
zindagī guzrī hai kis tarah ye ab yaad nahīñ

mire haath suljhā hī leñge kisī din
abhī zulf-e-hastī meñ ḳham hai to kyā ġham

jab tujhe yaad kar liyā sub.h mahak mahak uThī
jab tirā ġham jagā liyā raat machal machal ga.ī

afsāna-e-ġham tavīl hai dost
is baat ko muḳhtasar kareñge

ziist kī raah pe tanhā na kabhī chal paayā
ġham-e-jānāñ ġham-e-daurāñ bhī rahe dosh-ba-dosh

jo ġham guzrā hai mujh par āshiqī meñ
so maiñ hī jāntā huuñ yā mirā dil

tirī yādoñ se dil farozāñ kareñge
phir is ġham-kade meñ charāġhāñ kareñge

zamāna jo ātish-fishāñ hai to kyā ġham
ham ātish-kade ko gulistāñ kareñge