Tags-Gham

maiñ ġham-nasīb vo majbūr-e-shauq huuñ 'fānī'
jo nā-murād jiye aur ummīd-vār rahe

za.iif vaqtoñ meñ apne kumbe kī zimmedārī uThā.ī ham ne
tumhāre abbū ne muñh dikhā.ī meñ is hathelī pe ġham rakhā thā

shiddat-e-ġham hai maiñ bhī huuñ pyāsā 'amar'
aas paas ab koī mai-kadā dekhiye

ye nahīñ ġham ki maiñ pāband-e-ġham-e-daurāñ thī
rañj ye hai ki mirī zaat mirā zindāñ thī

dard-o-ġham kī hikāyateñ mat pūchh
dil pe guzrī qayāmateñ mat pūchh

ġhazal meñ laane se ġham aur baḌh gayā hai 'charāġh'
shuter girāo suḳhan kī dukān band karo

sandal kā maiñ daraḳht nahīñ thā to kis liye
jitne the ġham ke naag mujhī se lipaT ga.e

suḳhan rāz-e-nashāt-o-ġham kā parda ho hī jaatā hai
ġhazal kah leñ to jī kā bojh halkā ho hī jaatā hai

ai dilā ham hue pāband-e-ġham-e-yār ki tū
ab aziyyat meñ bhalā ham haiñ giraftār ki tū

jalte haiñ ġham se jān-o-dil-o-sīna-o-jigar
chāroñ taraf hai aag bujhā.ūñ kahāñ talak

yuuñ to zarā sī baat hai par baat hai baḌī
tū merā ġham-gusār tirā ġham-gusār maiñ

tap-e-ġham se hotī hai ab mafar ki tabīb-e-marg hai chāra-gar
mirā qissa aaj hai muḳhtasar mirī dāstān tamām hai

duniyā kā ġham hī kyā ġham-e-ulfat ke sāmne
bātil hai be-vajūd haqīqat ke sāmne

aaj to shikva-e-mahrūmī-e-dīdār nahīñ
ham ne kal ke liye is ġham ko uThā rakkhā hai

ġham ho ki ḳhushī koī tamāshā nahīñ karte
kuchh log kisī baat kā charchā nahīñ karte

vo ġham atā kiyā dil-e-dīvāna jal gayā
aisī bhī kyā sharāb ki paimāna jal gayā

peḌ ne rūThe hue mausam-e-gul ke ġham meñ
shāḳh ko dast-e-azā-dār banā rakkhā hai

nigal sakā na shab-e-ġham kā azhdahā mujh ko
ufuq pe vaqt-e-sahar āftāb ubhrā thā

pesh jo aayā sar-e-sāhil-e-shab batlāyā
mauj-e-ġham ko bhī magar mauj-e-tarab batlāyā

use phir kaun māregā batāo
ġham-e-hijrāñ ne bhī Thukrā diyā to