Tags-Gham

ġham abad kā nahīñ hai aan kā hai
aur is kā koī hisāb nahīñ

aa gayā yaad unheñ apne kisī ġham kā hisāb
hañsne vāloñ ne mire ashk jo gin ke dekhe

mānūs ho ga.e haiñ ġham-e-zindagī se ham
ham ko ḳhushī mile to na leñge ḳhushī se ham

ham shām-e-ġham ko sub.h-e-masarrat kā naam deñ
sūraj kareñ tulūa na kyuuñ tīrgī se ham

ġham khāte khāte ho gayā mānūs-e-ġham mizāj
ho jaate haiñ fasurda-o-mahvar ḳhushī se ham

manzil na milī to ġham nahīñ hai
apne ko to kho ke pā gayā huuñ

aadat se un kī dil ko ḳhushī bhī hai ġham bhī hai
ye lutf hai sitam bhī hai uzr-e-sitam bhī hai

is but kā vasl thā to ḳhudā.ī kā aish thā
ye jānte na the ki zamāne meñ ġham bhī hai

mar jaate ham to kab ke ajal dekhtī hai tū
fursat kisī ke ġham se hameñ koī dam bhī hai

vaqt kā ye moḌ kaisā hai ki tujh se mil ke bhī
tujh ko kho dene kā ġham kuchh aur gahrā ho gayā

be-dīd diid meñ nahīñ aate kisī tarah
ġham āshiyāñ hai tā.ir-e-rañg-parīda kā

zikr-e-ġham bazm-e-yār meñ 'zebā'
rañg bhī dekhte ho mahfil kā

mujhe mahrūmiyoñ kā ġham nahīñ hai
ye taufīq-e-talab bhī kam nahīñ hai

mohabbat naam hai ġham-peshgī kā
havas is raaz kī mahram nahīñ hai

tū phir se aa gayā hai mirī zindagī meñ dost
is baat kā maiñ lutf uThā.ūñ ki ġham karūñ

qismat meñ ḳhushī jitnī thī huī aur ġham bhī hai jitnā honā hai
ghar phūñk tamāshā dekh chuke ab jañgal jañgal ronā hai

tū sham-e-masarrat hai ġham-ḳhāna-e-imkāñ meñ
dam se tire qaa.em hai har bazm kī ra.anā.ī

kis din chubhī nahīñ haiñ masā.ib kī kirchiyāñ
kis din tumhāre ġham ne sañvārā nahīñ mujhe

jannat ḳhayāl meñ hai na duniyā nigāh meñ
kyā lazzateñ milī haiñ ġham-e-be-panāh meñ

dil ko rahe shu.ūr jo hāl-e-tabāh meñ
me.arāj-e-zindagī hai ġham-e-be-panāh meñ