Tags-Gham

har koī juujh rahā hai yahāñ apne ġham se
dard-e-ġham kī ye davā duuñ to davā duuñ kis ko

ġham meñ Duubā huā rahtā huuñ maiñ ab har lamha
'mīt' ye jaam pilā duuñ to pilā duuñ kis ko

ġham nahīñ gar ḳhushī nahīñ hāsil
furqat-e-dost kā malāl to hai

ek jaisā dariyā hai ek jaisī maujeñ haiñ ek jaisī tuġhyānī
āb-e-ġham kī lahroñ ke darmiyāñ to maiñ bhī huuñ darmiyāñ to tum bhī ho

miyān-e-dil koī letī hai Tiis añgḌā.ī
vahī hai rañj vahī ġham vahī qalaq phir se

ġham kī kitāb se dil-e-sad-pāra kam nahīñ
jis bazm meñ ga.e yahī afsāna saath hai

ḳhvāb hasrat ashk uljhan nāla-o-faryād-o-ġham
kisht-e-jāñ meñ roz fasl-e-dard ugtī hai miyāñ

tirī aarzū se bhī kyuuñ nahīñ ġham-e-zindagī meñ koī kamī
ye savāl vo hai ki jis kā ab koī ik javāb nahīñ rahā

apne ġham kī uljhaneñ suljhāoge kab tak 'munīr'
dard ālam-gīr ho jaa.e yahī ab chāhiye

karam karte nahīñ kyuuñ tum mire qalb-e-shikasta par
mirā yuuñ ġham-zada rahnā agar achchhā nahīñ lagtā

maiñ apnī ḳhushiyāñ akele manāyā kartā huuñ
yahī vo ġham hai jo tujh se chhupā huā hai mirā

aisā kiyā za.iif ġham-e-intizār ne
āñkhoñ ko merī baar hai ḳhvāb-e-girāñ talak

tujhe ḳhabar bhī hai kuchh ai masarratoñ ke naqīb
maiñ kab se sāya-e-dīvār-e-ġham meñ baiThā huuñ

jhulas ga.ī hai havā-e-dayār-e-dard mujhe
bas ek pal ke liye shahr-e-ġham meñ Thahrā huuñ

maiñ apne paañv kā kāñTā maiñ apne ġham kā asiir
misāl-e-sañg-e-garāñ rāste meñ baiThā huuñ

shiddat-e-shauq meñ sarmast-o-shādāñ niklā
ġham-rasīda bhī agar thā to ġhazal-ḳhvāñ niklā

kis ko fursat hai yahāñ dūsroñ ke ġham bāñTe
log ḳhushiyoñ ke ḳharīdār nazar aate haiñ

shikva-e-ġham tire huzūr kiyā
ham ne be-shak baḌā qusūr kiyā

is ġham ne kaisī shakl badal lī ki kal talak
dushman thā merī jaan kā ab jaan ho gayā

koī lashkar ki dhaḌakte hue ġham aate haiñ
shaam ke saa.e bahut tez qadam aate haiñ