Tags-Gham

umr-bhar kī uljhan de ek pal kā nazzāra
terā ġham haqīqat bhī aur be-nishāñ bhī hai

kārvāñ luT gayā rāhbar chhuT gayā raat tārīk hai ġham kā yaarā nahīñ
raah meñ bhī koī sham.a jaltī nahīñ āsmāñ par bhī koī sitārā nahīñ

ye bahār-o-ḳhizāñ ye ḳhushī aur ġham ye hasīñ nāznīñ dil ke patthar sanam
sab sahāre haiñ bas chaar din ke liye zindagī-bhar kā koī sahārā nahīñ

ġham kī garmī se dil pighalte rahe
tajrabe āñsuoñ meñ Dhalte rahe

gulshan-e-dil se guzarne ke liye
ġham ko raftār-e-sabā dī ham ne

ġham kī tashrīh bahut mushkil thī
apnī tasvīr dikhā dī ham ne

shahr kī vīrāñ saḌak par jashn-e-ġham karte hue
jā rahā huuñ ḳhushki-e-mizhgāñ ko nam karte hue

unhoñ kā jal rahā hai dil ḳhudā jaane ki kyā boleñ
mirā ahvāl koī mere ġham-ḳhvāroñ se mat pūchho

har dam ye do adū haiñ pa.e-jān-e-nā-tavāñ
ik dard-e-ishq hai ġham-e-hijrāñ hai dūsrā

ġham baḌhne de ai dil aur zarā jāñch aah kī be-tāsīr na kar
hai ḳhvāb adhūrā aap abhī be-samjhe ġhalat ta.abīr na kar

shāḳh-e-ġham pe khil uTThe phuul kuchh umīdoñ ke
'sham.a' qarya-e-dil meñ ḳhvāhishoñ kā mausam hai

koī hasīn giit koī ras-bharī ġhazal
yaaro ilāj-e-ġham-zadgāñ kuchh na kuchh to ho

bas ai sip.har sa.ī se terī to roz-o-shab
yaañ ġham satāne ko hai jalāne ko ishq hai

istaqāmat hai qayāmat kī sar-e-dariyā-e-ġham
har safīna mauj par hai Doltā koī nahīñ

ruuh ko ālā.ish-e-ġham se kabhī ḳhālī na rakh
yaanī be-zangār kis kā aa.inā raushan huā

raat bhī chāñd bhī samundar bhī
mil ga.e kitne ġham-gusār mujhe

raushnī aur kuchh baḌhā jā.ūñ
soz-e-ġham aur bhī nikhār mujhe

vo jo har diin se munkir thā har ik dharm se duur
phir bhī har diin har ik dharm kā ġham-ḳhvār rahā

vo jo hamrāz rahā hāzir-o-mustaqbil kā
us ke ḳhvāboñ kī ḳhushī ruuh kā ġham le ke chalo

ġham vo hai jo har chiiz ko pighlā ke bahā de
paanī nahīñ sayyāl sharāre haiñ ye aañsū