jism o jaañ sulagte haiñ bārishoñ kā mausam hai
ab to lauT kar aa jā chāhatoñ kā mausam hai
mere ḳhushk hoñToñ par qahqahe to haiñ lekin
merī ruuh ke andar siskiyoñ kā mausam hai
ḳhvāb aur nīndoñ kā ḳhatm ho gayā rishta
muddatoñ se āñkhoñ meñ rat-jagoñ kā mausam hai
thā mire ḳhayāloñ meñ gulshan ik tamannā kā
mujh ko ye gumāñ guzrā ḳhushbuoñ kā mausam hai
shāḳh-e-ġham pe khil uTThe phuul kuchh umīdoñ ke
'sham.a' qarya-e-dil meñ ḳhvāhishoñ kā mausam hai