Tags-Gham

ai shab-e-ġham har ek pal terā
mujh ko sadiyāñ masīl hotā hai

nazar ko tuur banā dil ko markaz-e-asrār
ġham-e-alast se aish-e-davām paidā kar

ashk bhare haiñ nain kaTore ġham kī lazzat yaar na pūchh
ishq-nagar ke mehmānoñ kī ḳhātir kyā jalpān milā

shu.ūr-e-qais ne sahrā meñ ḳhud-kushī kar lī
kahā gayā ġham-e-lailā meñ ḳhud-kushī kar lī

ġham-e-hayāt ke ātish-kade se aayā thā
vo jis ne kuud ke dariyā meñ ḳhud-kushī kar lī

taġhāful aur baḌhā us ġhazāl-e-ra.anā kā
fusūn-e-ġham ne bhī jaadū jagā.e haiñ kyā kyā

ġham ho ki ḳhushī donoñ kuchh duur ke sāthī haiñ
phir rasta hī rasta hai hañsnā hai na ronā hai

kyā kahūñ kitnā fuzūñ hai tere dīvāne kā dukh
ik taraf jaane kā ġham hai ik taraf aane kā dukh

ḳhushī kā kyā hai hamesha fareb detī hai
to apne ġham ko hī ab mo'atabar banāyā jaa.e

masarrat aur rāhat se na thiiñ ra.anā.iyāñ kaafī
'anīs' ehsān ġham ke bhī bahut haiñ nā-tavāñ dil par

kab dil kī taraf lauT ke ā.eñge safīne
sahrā ke bagūle ġham-e-jāda nahīñ rakhte

tujh se parda nahīñ mire ġham kā
tū mirī zindagī kā mahram hai

phir mujhe darpesh haiñ ḳhushiyāñ tumhārī
phir se ġham apnā chhupānā paḌ gayā hai

ab ye aalam hai ki ġham kī bhī ḳhabar hotī nahīñ
ashk bah jaate haiñ lekin aañkh tar hotī nahīñ

haa.e kis aalam meñ chhoḌā hai tumhāre ġham ne saath
jab qazā bhī zindagī kī chāra-gar hotī nahīñ

sach hai yuuñ to ġham bahut the qaid kar paa.e nahīñ
āsmāñ sar pe khulā thā dil ye be-par bhī na thā

jis ġham se dil ko rāhat ho us ġham kā mudāvā kyā ma.anī
jab fitrat tūfānī Thahrī sāhil kī tamannā kyā ma.anī

tumhārā rūThnā tamhīd thī afsāna-e-ġham kī
zamāna ho gayā ham se mizāj-e-dil nahīñ miltā

ham apnā ġham liye baiThe haiñ us bazm-e-tarab meñ bhī
kisī naġhme se ab 'maḳhmūr' sāz-e-dil nahīñ miltā

maiñ ne yaaro tum se sunā thā vaqt kā marham bhar de har ġham
aglī pichhlī saarī bāteñ mujh ko bhuul hī jaanā thā