Tags-Gham

satāyā 'mīr' ġham-kash ko kinhoñ ne
ki phir ab arsh tak jaate haiñ naale

ġham ke aane kā koī ġham nahīñ ham ko 'asġhar'
apnī marzī hī se aayā hai chalā jā.egā

rahe the jo sharīk-e-ġham shab-o-roz
ḳhushī dekhī to vo shāmil nahīñ ab

itnā sukūn to ġham-e-pinhāñ meñ aa gayā
āġhosh-e-dil se dāman-e-mizhgāñ meñ aa gayā

bachā.iye dil-e-zinda ko ḳhuun hone se
na dekhiye ki ġham-e-māh-o-sāl hai kitnā

iz.hār-e-ġham kiyā thā ba-ummīd-e-iltifāt
kyā pūchhte ho kitnī nadāmat hai aaj tak

dar-asl vo kaisā hai ye ba.ad kī bāteñ haiñ
chehre se magar 'shāhid' ġham-ḳhvār sā lagtā hai

'bāqar' tez shuāoñ se sab momī chehre pighal ga.e
sub.h talak pathrīle ġham the aur thā TūTā-phūTā maiñ

havā chaltī hai dam Thahrā huā hai
fazā meñ kis kā ġham Thahrā huā hai

bujhā hai dil to na samjho ki bujh gayā ġham bhī
ki ab charāġh ke badle charāġh kī lau hai

kaTe jo tīrgi-e-shām-e-ġham to kaise 'shamīm'
ḳhafā ḳhafā sī kisī ke ḳhayāl kī zau hai

ġham-gusārī ḳhulūs mehr-o-vafā
ho ga.e haiñ ye phuul baasī kyuuñ

ilāhī aa na paḌe phir koī ġham-e-tāza
uḌā uḌā sā hai rū-e-nigār kā ġhāza

alam ke dard ke hasrat ke ġham ke
maze jitne haiñ saare chaTpaTe haiñ

vo shām-e-ġham jo guzārī ham ne koī guzāre to jaan paa.e
kaThin hai kitnā hai kaisā mushkil uThā ke maazī meñ haal rakhnā

ġham-e-furqat kā kyā shikva qayāmat aane vaalī hai
ḳhudā ke sāmne āḳhir to ik din sāmnā hogā

zikr yuuñ kartā huuñ apne ġham kā apne dard kā
hosh vāloñ ko bhī dīvāna banā detā huuñ maiñ

nashtar-e-yād-e-ġham-e-jānāñ se 'qaisar' in dinoñ
zaḳhm jo sote haiñ un ko phir jagā detā huuñ maiñ

falsafa ho zindagī kā bas yahī
ġham kamāo to uḌāne ke liye

mere ashkoñ ne umr bhar likkhī
ek ġham kī kitāb āñkhoñ meñ