niiñd hai aur na ḳhvāb āñkhoñ meñ
utrā kaisā azaab āñkhoñ meñ
dil meñ vīrāniyāñ basīñ jab se
haiñ khaTakte gulāb āñkhoñ meñ
mere ashkoñ ne umr bhar likkhī
ek ġham kī kitāb āñkhoñ meñ
ḳhuun bhī dekhne se Dartī haiñ
ab nahīñ aur taab āñkhoñ meñ
sah na pāoge jhāñk kar dekho
merā Dhaltā shabāb āñkhoñ meñ
mere saare savāl kā us kī
mil gayā hai javāb āñkhoñ meñ
'sād' dil be-qarār thā jitnā
thā vahī iztirāb āñkhoñ meñ