Tags-Gham

bīmār-e-ġham kī chāragarī kuchh zarūr hai
vo dard dil meñ de ki masīhā kaheñ jise

dard-o-ġham se jo tapāñ thā vo milā dil mujh ko
is liye dafn kiyā hai lab-e-sāhil mujh ko

'maikash' ko mai-kada meñ bhī ġham se nahīñ mafar
haiñ bāda-ḳhvār jam.a magar mutma.in nahīñ

har dil meñ chhupā hai tiir koī har paañv meñ hai zanjīr koī
pūchhe koī in se ġham ke maze jo pyaar kī bāteñ karte haiñ

aañsū bhī bahā kar dekh liye soz-e-ġham-e-pinhāñ kam na huā
dil meñ tirī ulfat kā sho.ala sho.ala hī rahā shabnam na huā

thā dāġh-e-tamannā rūh-shikan kuchh himmat-e-ġham kaam aa hī ga.ī
dil meñ to baḌe tūfān uThe aañsū na bahe mātam na huā

kaafī hai 'farīdī' ko vo nazar jo marham-e-zaḳhm-e-hastī hai
tū ne jise apnā ġham baḳhshā phir us ko kisī kā ġham na huā

umr-e-azīz saarī dil hī ke ġham meñ guzrī
bīmār āshiqī ye kis din bhalā rahegā

dīdār kā to va.ada mahshar meñ dekh kar kar
bīmār ġham meñ tere tab tak to kyā rahegā

ashk ḳhūnāb ho chale haiñ
ġham kī rañgat badal chalī hai

tumheñ kyuuñ is qadar ġham hai 'hafīz' apnī tabāhī kā
yahī duniyā kā hai naqsha abhī kuchh hai abhī kuchh hai

tere aariz pe ye Dhalke hue sīmīñ aañsū
merī afsurdagi-e-ġham kā mudāvā to nahīñ

jab talak talḳhī-e-shorāba-e-ġham chākhā niiñ
tab talak lazzat-e-dīdār kuuñ kui kyā jaane

maiñ kahā zaḳhmī-e-ġham huuñ to diyā us ne javāb
ai 'sirāj' aise chhupe vaar kuuñ kui kyā jaane

ham shahīd-e-ġham-o-alam hī sahī
zindagī to hai surḳh-rū ham se

tumhāre va.ada-e-shab kā yaqīñ aatā nahīñ un ko
rahīn-e-fitna-e-ġham haiñ sukūñ nā-āshnā āñkheñ

dil dhaḌaktā hai shab-e-ġham meñ kahīñ aisā na ho
marg bhī ban kar mizāj-e-yār tarsā.e mujhe

paanī se sag-gazīda Dare jis tarah 'asad'
Dartā huuñ aa.ine se ki mardum-gazīda huuñ

kisī se kuchh na kaheñge hoñ laakh ġham ab to
bahut hai zillat-o-rusvā.ī ġham sunāne meñ

tamām umr mirā ġham se bas rahā rishta
maza sā aane lagā mujh ko zaḳhm khāne meñ