Tags-Gham

ġham-e-mohabbat hai kār-farmā duā se pahle asar se pahle
batā rahī hai ye dil kī dhaḌkan vo aa rahe haiñ ḳhabar se pahle

kabhī tasavvur meñ aa.e bhī to ghanerī zulfoñ ko ruḳh pe Daale
hamārī qismat meñ shām-e-ġham thī numūd-e-nūr-e-sahar se pahle

ek vo haiñ ki jinheñ apnī ḳhushī le Duubī
ek ham haiñ ki jinheñ ġham ne ubharne na diyā

agar dilā ġham-e-gesū-e-yā baḌh jaatā
shab-e-firāq meñ aur intishār baḌh jaatā

dil par hai mire ḳhema-e-har-ābla asnād
kyā kījiye ki ye lashkar-e-ġham uTh nahīñ saktā

matā-e-lauh-o-qalam chhin ga.ī to kyā ġham hai
ki ḳhūn-e-dil meñ Dubo lī haiñ uñgliyāñ maiñ ne

is dasht-e-kā.enāt meñ jiine ke vāste
soz-e-ġham-e-hayāt bhulānā paḌā hameñ

ġham-e-insāñ se jo dil sho.ala-ba-jāñ hotā hai
vahī har daur meñ memār-e-jahāñ hotā hai

maiñ vo ma.anī-e-ġham-e-ishq huuñ jise harf harf likhā gayā
kabhī āñsuoñ kī bayāz meñ kabhī dil se le ke kitāb tak

ḳhushā ki aur milā ġham kā tāziyāna hameñ
ḳhushā vo dard jo chhāyā hai naġhmagī ban kar

de hausle kī daad ki ham tere ġham meñ aaj
baiThe haiñ mahfiloñ ko sajā.e tire baġhair

tere ġham ke hazār pahlū haiñ
baat ham muḳhtasar kareñ kaise

ik barq-e-be-qarār thī tamkīn-e-husn bhī
jis vaqt ishq ko ġham-e-sabr-āzmā diyā

ma.alūm hai haqīqat-e-ġham-hā-e-rozgār
duniyā ko tere dard ne duniyā banā diyā

ai shoḳhi-e-nigāh-e-karam muddatoñ ke ba.ad
ḳhvāb-e-girān-e-ġham se mujhe kyuuñ jagā diyā

gum-karda-e-vafūr-e-ġham-e-intizār huuñ
tū kyā chhupā ki mujh ko mujhī se chhupā diyā

zamīñ kā mujh se havāla bhī TuuT paayā nahīñ
maiñ sarfarāz rahā terā ġham uThāne meñ

zindagī hogī mirī ai ġham-e-daurāñ ik roz
maiñ sañvāruñgā tirī zulf-e-pareshāñ ik roz

tumhīñ batāo pukārā hai baar baar kise
aziiz kahte haiñ ġham-hā-e-rozgār kise

aao chalte haiñ kisī aur hī duniyā meñ jahāñ
ḳhud ko ġham kar ke kisī aur ko paayā jaa.e