Tags-Gham

ek ġham hotā to siine se lagā letā koī
ġham kā ambār uThāne pe na pahuñchā āḳhir

dekh kar masjid meñ mujh ko muztarib
mere ġham meñ but-kada rone lagā

ham samajhte the ġham-e-dil kā mudāvā hogī
vo nazar pursish-e-hālāt se aage na baḌhī

ishq har marhala-e-ġham kī hadeñ toḌ chukā
aql andesha-e-hālāt se aage na baḌhī

shab-e-ġham meñ bhī merī saḳht-jānī ko na maut aa.ī
tirā kaam ai ajal ab ḳhanjar-e-qātil se niklegā

yahī nahīñ koī tūfāñ mirī talāsh meñ hai
ki mausam-e-ġham-e-jānāñ mirī talāsh meñ hai

har koī apne ġham meñ hai masrūf
kis ko dard-āshnā kahe koī

ġham se samjhautā kar liyā dil ne
ab yahāñ siskiyāñ nahīñ huuñ

har alam se har balā se mil ga.ī dil ko najāt
jab se terā ġham milā hai apne saare ġham ga.e

pukārā qāsid-e-ashk aaj fauj-e-ġham ke hāthoñ se
huā tārāj pahle shahr-e-jāñ dil kā nagar pīchhe

mujh ko ye ġham ki unheñ dekhne vaale haiñ bahut
un ko shikva ki yahāñ zauq-e-nazar aam nahīñ

safar-e-ishq mubārak ho ki is meñ 'kausar'
ġham-e-āġhāz nahīñ ḳhatra-e-anjām nahīñ

ye bār-e-ġham uThā kar dekhte haiñ
tumheñ bhī aazmā kar dekhte haiñ

is qadar ġham hai mere qātil ko
jis qadar maiñ huuñ imtihān se ḳhush

libās dekh ke itnā hameñ ġharīb na jaan
hamārā ġham tirī imlāk se ziyāda hai

dil ġham se bojhal ho to dekho phir chheḌeñ us kī
chhīñTe muñh pe maar ke kyā barsāteñ kartā hai

bachchoñ ko ham na ek khilaunā bhī de sake
ġham aur baḌh gayā hai jo tyauhār aa.e haiñ

sar-e-āb-jū rahe tishna-lab to ye zabt-e-ġham kī hai intihā
mire haal pe the jo nukta-chīñ mirā hausla bhī to dekhte

vo mirī ḳhushī se haiñ ḳhush-gumāñ ki nashāt-e-zīst hai mudda.ā
mire ashk-e-ġham kā rukā huā kabhī qāfila bhī to dekhte