Tags-Dil

haal dil kā use jatānā kyā
na sune jo use sunānā kyā

jān-o-dil le ke ab ḳhafā hai kyuuñ
ham ne kahnā tirā na maanā kyā

dil-e-ḳhud-rafta kā ilaaj kare
koī nādān aur daanā kyā

le ke dil jo ki dushman-e-jāñ ho
'aish' aise se dil lagānā kyā

jo dil paayā hai to chaar ashk ro le
zamīñ achchhī milī hai biij bole

sadā apnī hai bāzār-e-junūñ meñ
dil apnā muft kā saudā hai jo le

khulegī zulf se ḳhud dil kī chorī
vo jaadū kyā na jo sar chaḌh ke bole

tujhe hai iḳhtiyār aanā na aanā
dil-e-muztar kā kahnā maan to le

kisī ko de diyā dil muft apnā
'jalīl' aise hī to haiñ aap bhole

ik aañsū kah gayā sab haal dil kā
na samjhā thā ye zālim be-zabāñ hai

mizhgāñ se us ke kyūñkar dil chhuT sake hamārā
ghere hue haiñ is ko ve ḳhaar sab taraf se

dabī chiñgāriyāñ dil kī kuredo mat adāoñ se
kahīñ sho.ala na ban jaa.e sharar āhista āhista

maiñ hāl-e-dil batā to duuñ magar rusvā.ī kā Dar hai
idhar kī baat hotī hai udhar āhista āhista

tum pūchho aur maiñ na batā.ūñ aise to hālāt nahīñ
ek zarā sā dil TuuTā hai aur to koī baat nahīñ

zabt-e-nāla dil-e-figār na kar
aag ko aur sho.ala-bār na kar

shab-e-ġham dāġh-e-dil kī sham.a jalā
chāñd-tāroñ kā intizār na kar

dūsroñ kā to zikr ishq meñ kyā
apne dil par bhī e.atibār na kar

shab ko mirī chashm-e-hasrat kā sab dard-e-dil un se kah jaanā
dāñtoñ meñ dabā kar hoñT apnā kuchh soch ke us kā rah jaanā

ai yaas na mānūñgā terī bas dil ko ziyāda ab na dukhā
samjhā chukī us kī pahelī nigah dukh-dard jo ho vo sah jaanā

naale hoñ ki aaheñ ai shab-e-ġham jab aa ga.iiñ lab par sabr kiyā
sahne ko to sab kuchh dil ne sahā sahne kī tarah kab sah jaanā