Tags-Dil

bahut bujhī huī bātoñ kā bojh hai dil par
magar kisī ko bhī kyā 'talḳh' ne ḳhabar dī hai

har zaḳhm-e-dil se anjuman-ārā.ī maañg lo
phir shahr-e-pur-hujūm se tanhā.ī maañg lo

guzre haiñ ham pe aise bhī lamhe kabhī kabhī
dil ro paḌā hai sun ke latīfe kabhī kabhī

har dil ko aap ā.ina-ḳhāna na jāniye
patthar se saḳht hote haiñ shīshe kabhī kabhī

insān ke dil ko hī koī saaz nahīñ hai
kis parde meñ varna tirī āvāz nahīñ hai

kisī kā kaam dil is charḳh se huā bhī hai
koī zamāne meñ ārām se rahā bhī hai

jo puḳhta-maġhz haiñ ve soz-e-dil nahīñ kahte
kisī ne sham.a se jalne meñ kuchh sunā bhī hai

tū qātiloñ se lagātā hai dil ko kyuuñ 'tābāñ'
ki un ke haath se jiitā koī bachā bhī hai

kyuuñ minnat-e-chāra-gar kiije kyuuñ fikr-e-davā-e-dil kiije
bīmār-e-mohabbat ke naale ḳhud dard kā darmāñ hote haiñ

sham-e-dil laayā huuñ ye soch ke mahfil meñ tirī
ho kamī kuchh na tirī anjuman-ārā.ī meñ

kyuuñ ujaḌ jaatī hai dil kī mahfil
ye diyā kaun bujhā detā hai

nazar milāte nahīñ muskurā.e jaate haiñ
batāo yuuñ bhī kahīñ dil milā.e jaate haiñ

kaifiyat-e-mai dil kā darmāñ na huī lekin
rañgīñ to rahī duniyā kuchh der nigāhoñ meñ

dil bhī ehsāsāt bhī jazbāt bhī
kam nahīñ haiñ ham pe ilzāmāt bhī

dar-e-dildār pā.ūñ kiyā 'jāved'
kahīñ do-chār naqsh-e-pā bhī nahīñ

mujhe huā yaqīn apne ishq ke shabāb par
jab āñsuoñ ke rāstoñ pe mere dil kā ḳhuuñ chalā

paroñ se us ke kaT ga.e bulandiyoñ ke āsmāñ
uḌaan bhar ke jab havāoñ par dil-e-zabūñ chalā

guzar ga.ī sadī ye fikr-e-tīr-e-chashm-e-nāz meñ
tamām jism chhoḌ kar ye sirf dil pe kyuuñ chalā

vahshat-e-dil ne hijābāt-e-jahāñ chaak kiye
ek parda ruḳh-e-jānāñ se uThāyā na gayā

kar diyā daftar-e-hastī to pareshāñ dal ne
magar ik ḳhvāb-e-pareshāñ ko bhulāyā na gayā