Tags-Dil

qadam apne harīm-e-nāz meñ is shauq se rakhnā
ki jo dekhe mire dil ko tumhārā āstāñ samjhe

hameñ kahtī hai duniyā zaḳhm-e-dil zaḳhm-e-jigar vaale
zarā tum bhī to dekho ham ko tum bhī ho nazar vaale

hameñ mālūm hai ham mānte haiñ ham ne sīkhā hai
dil āzurda huā karte haiñ az had chashm-e-tar vaale

kaTāne ko galā āThoñ pahr maujūd rahte haiñ
vo dil vaale jigar vaale sahī ham bhī haiñ sar vaale

ye vīrānī sī yūñhī to nahīñ rahtī hai āñkhoñ meñ
mire dil hī se koī jāda-e-vahshat nikaltā hai

zamīñ kā dard be-badan bhī ho ke apne dil meñ thā
tabhī to khiñch ke aa ga.e the varna āsmāñ meñ ham

dil hī dil meñ vo buġhz rakhtā hai
jo ba-zāhir ḳhafā nahīñ mujh se

tire faqīr ko itnī sī jā bhī kaafī hai
jo tere dil meñ nikal aa.e ek konā bhī

dil ke parde pe chehre ubharte rahe muskurāte rahe aur ham so ga.e
tirī yādoñ ke jhoñke guzarte rahe thapthapāte rahe aur ham so ga.e

yaad aatā rahā kūcha-e-raftagāñ sar pe sāya-fagan hijr kā āsmāñ
nā-rasā.ī ke sadme nikharte rahe dil jalāte rahe aur ham so ga.e

tū hī dil-e-betāb jo so jaa.e to so jaa.e
ye chāñdnī is raat to maddham nahīñ hogī

dil se sharminda huuñ ye ash.ār jo maiñ ne kahe
aap ke e.azāz meñ dīvān honā chāhiye

ham bayāñ ro ro ke dil kā mudda.ā karte rahe
ahl-e-mahfil muskurā kar vāh-vā karte rahe

nigāh-e-nāz jab uThī ajiib kaam kar ga.ī
jo rañg-e-ruḳh uḌā diyā to dil meñ rañg bhar ga.ī

mirī samajh meñ aa gayā har ek rāz-e-zindagī
jo dil pe choT paḌ ga.ī to duur tak nazar ga.ī

kalī dil-e-tabāh kī khilī na 'chishti'-e-hazīñ
ḳhizāñ bhī aa ke jā chukī bahār bhī guzar ga.ī

jhagḌā thā jo dil pe us ko chhoḌā
kuchh soch ke sulh kar ga.e ham

thiiñ lutf se dil meñ jur.ateñ kuchh
par tere ġhazab se Dar ga.e ham

dil jo sahrā ke sarāboñ se mirā uub gayā
yaad aa.ī mujhe bhūle hue ghar kī sūrat

taaze khile haiñ daaġh ke gul dil ke baaġh meñ
phir mausam-e-bahār huā kyā bajā huā