Tags-Dil

hasrat hai ham bhī kahte kisī din ye ai falak
ai dil mubārak aaj to dilbar baġhal meñ hai

mujh riñd-e-bādah-kash ko ye jo ḳhauf-e-mohtasib
dil kī tarah chhupī huī botal baġhal meñ hai

bahr-e-sarashk dīda-e-dil meñ hai maujzan
dekho tilism-e-husn ki dariyā kañval meñ hai

dil phuk rahā hai garche ham āġhosh hai vo gul
pahlū meñ mere ḳhuld hai dozaḳh baġhal meñ hai

pahlū meñ dil hamāre hai zeb-e-kanār-e-yār
āġhosh meñ hai dost to dushman baġhal meñ hai

dard kī aag bujhā do ki abhī vaqt nahīñ
zaḳhm-e-dil jaag sake nashtar-e-ġham raqs kare

jigar ko chaak ki dil ko lahū lahū kiije
hayāt ko kisī unvān surḳh-rū kiije

bezār kareñge ḳhātir ko pahle to tumhārī chāhat se
phir dil ko bhī kuchh minnat se kuchh haibat se samjhā.eñge ham

gar kahnā dil ne maan liyā aur ruk baiThā to bahattar hai
aur chain na lene devegā to bhes badal kar ā.eñge ham

avval to nahīñ pahchānoge aur loge bhī pahchān to phir
har taur se chhup kar dekheñge aur dil ko ḳhush kar jā.eñge ham

ab marīz-e-ishq ko kaisā Thikāna chāhiye
ātish-e-dil ko havā par āshiyāna chāhiye

purāne peḌ phir taaza phaloñ se ladne lagte the
ga.e mausam se dil jab bhī gurezāñ hone lagtā thā

jab parī-rū hijāb karte haiñ
dil ke darpan kuuñ aab karte haiñ

dekh us ke hinā kuuñ mardum-e-chashm
ḳhūn-e-dil suuñ ḳhizāb karte haiñ

dil-o-nigāh ke rastoñ meñ kaun haa.il hai
ki ham pe band hue raushnī bhī paanī bhī

harf-o-bayāñ nazāre sitāre dil-o-nazar
har shai meñ intishār hai manzūm kuchh nahīñ

tere bhañvoñ kī yaad ne TukḌe kiyā hai dil
hai zul-fiqār haidar-e-karrār kī qasam

suneñ mujh ko to maiñ dhaḌkan huuñ dil kī
nahīñ sunte to sahrā kī sadā huuñ

hamāre dil meñ kabūtar namāz paḌhte haiñ
hamāre dil meñ ta.assub kā jaal thoḌī hai

dil ke ujḌe nagar ko kar ābād
is Dagar ko bhī koī raahī de