Tags-Dil

dil par to lagāte ho tum tīr-e-nazar lekin
aahoñ ko hamārī bhī talvār samajh lenā

rakhe hai shīsha mirā sañg saath rabt-e-qadīm
ki aaTh pahr mire dil ko hai shikast se kaam

dil meñ hotā na mire daḳhl balā-e-kākul
saaya rahtā na kabhī girya makāñ kil jaatā

le chukā dil ko vo mujh haath se tab maiñ ne kahā
is qadar terā matālib na huā thā so huā

karnā tasḳhīr har ik dil ko do ik bātoñ meñ
is tarah kā bhī ajā.ib na huā thā so huā

kahne ko dil kī baat jinheñ DhūñDte the ham
mahfil meñ aa ga.e haiñ vo apne nasīb se

ye maanā shīsha-e-dil raunaq-e-bāzār-e-ulfat hai
magar jab TuuT jaatā hai to qīmat aur hotī hai

ham dil lagā ke tum se hue yaañ talak ba-tañg
jo apne jī se kahte haiñ lāchār bas jī bas

sun kar kahā ki kyā mire lagtī hai dil meñ aag
shikva se jab kare hai tū iz.hār bas jī bas

peḌ ūñchā hai magar zer-e-zamīñ kitnā hai
lab pe hai nām-e-ḳhudā dil meñ yaqīñ kitnā hai

kabhī to chāñd bhī utregā dil ke āñgan meñ
kabhī to mauj meñ aa.egā ye kinārā bhī

nikāl dil se ga.e mausamoñ kī yaad 'ajmal'
tirī talāsh meñ imroz bhī hai fardā bhī

andher hai dayār-e-mohabbat meñ ham-damāñ
taqsīr dil kī Thahre kare jo gunāh chashm

donoñ makān ġhair se ḳhālī haiñ aa ke baiTh
tere pasand ḳhvāh ye dil aa.e ḳhvāh chashm

yā rāhat-e-dil ban kar aao yā āfat-e-dil ban kar aao!
pahchān hī lūñgā maiñ tum ko jis bhes meñ bhī tum aaoge

ḳhuun jab ashk meñ Dhaltā hai ġhazal hotī hai
jab bhī dil rañg badaltā hai ġhazal hotī hai

mirī nākāmiyoñ par hañsne vaale
tire pahlū meñ shāyad dil nahīñ hai

dil meñ jo apne yaar hai to dil baġhal meñ hai
phir kyuuñ hai ġham ki sāhab-e-ḳhāna mahal meñ hai

hai yaad dil meñ panja-e-rañgīn-e-yār kī
mehñdī ke chor kā guzar apne mahal meñ hai

pahlū meñ mujh hazīñ ke Tapaktā hai rāt-din
yārab ye dil hai yā koī phoḌā baġhal meñ hai