Tags-Dil

aaj dil khol ke ro.e haiñ to yuuñ ḳhush haiñ 'farāz'
chand lamhoñ kī ye rāhat bhī baḌī ho jaise

shuhūd-e-dil-zadgāñ manzaroñ meñ rakh aanā
lahū ke daaġh guloñ ke paroñ meñ rakh aanā

kahānī zindagī kī yuuñ to dilkash hai magar 'vāhid'
koī ik baar jo paḌh le to dohrā.ī nahīñ jaatī

are ye dil aur itnā ḳhālī
koī musībat hī paal rakhiye

maiñ sāf-tabī.at huuñ kuchh dil meñ nahīñ rakhtā
kyā soch ke muñh tum ne ā.īne se pherā hai

dil toḌ diyā tum ne merā ab joḌ chuke tum TuuTe ko
vo kaam nihāyat āsāñ thā ye kaam balā kā mushkil hai

jin ke dil meñ hazār shikve haiñ
un ke māthe pe bal nahīñ miltā

butoñ se un ko nahīñ lagāvaT misoñ kī lete nahīñ vo aahaT
tamām quvvat hai sarf-e-ḳhvāñdan nazar ke bhole haiñ dil kī saade

to kyā yaqīn dilāne se maan jāoge?
yaqīñ dilā.ūñ ki ye hijr dil pe baar nahīñ

vo dil kī baat nigāhoñ se jaan saktā thā
vo jald-bāz magar in meñ jhāñktā hī nahīñ

naqshe pe khiñch sakā jab maanī se dil-jaloñ kā
jis jā makān-e-dil thā ātish-kada banāyā

shīshagarī pe nāzāñ be-kār shīsha-gar haiñ
koī bhī dil kisī kā TuuTā huā banāyā

ai ḳhirad aur junūñ ḳhudā-hāfiz
ai dil-e-be-sukūñ ḳhudā-hāfiz

hunar-varī ko na sho.ala na raakh daaġh banā
jo dil meñ lau hai use sher meñ charāġh banā

banā rahā huuñ maiñ ik naqsh terī chāhat kā
kabhī to dil ye banā hai kabhī dimāġh banā

vo merī baat jab suntā nahīñ hai
jo mere dil meñ hai kahtā nahīñ huuñ

dil hī dil meñ yaañ mohabbat apnā ghar kartī rahī
ham rahe ġhāfil vo sau TukḌe jigar kartī rahī

vo kabhī jab iltifāt-e-nāz se lete haiñ kaam
kaañp jaatā huuñ maiñ apne dil ke armāñ dekh kar

karte haiñ arbāb-e-dil andāza-e-josh-e-bahār
merā dāman dekh kar merā garebāñ dekh kar