Tags-Dil

bahut nauhagarī karte haiñ dil ke TuuT jaane kī
kabhī aap apnī chīzoñ kī nigahbānī bhī karte haiñ

āñkheñ rañgoñ kī barsāteñ tak tak jhiil huiiñ
dil ne kyā kyā aks kashīd kiye tasvīroñ se

tū hai kis manzil meñ terā bol khaañ hai dil kā Thaar
dam tirā aatā hai khaañ suuñ bol khaañ jaatā hai bhaar

chaleñge paañv us kūche kī jānib
magar ilzām sab dil par lagegā

ham apne dil kī bābat kyā batā.eñ
kabhī masjid kabhī mandar lagegā

jahāñ raqs karte ujāle mile
vahīñ dil ke TuuTe shivāle mile

ye sach hai bakvās nahīñ hai
vo ab dil ke paas nahīñ hai

dil ko har-chand kuredā magar us kī tah meñ
ek bahke hue raahī ke sivā kuchh na milā

sirf halkī sī be-qarārī hai
aaj kī raat dil pe bhārī hai

lab-e-ḳhirad se yahī baar baar niklegā
nikālne hī se dil kā ġhubār niklegā

ye zindagī to sarī-uzzavāl hai 'najmī'
dil apnā is ke liye kyuuñ lahū karūñgā maiñ

misl-e-charāġh tīrgi-e-jism-o-jāñ meñ dil
ik shahr-e-be-nishān thā vo bhī nahīñ rahā

tirī nazar ke ishāroñ pe aa.ina na huā
ye dil kī taaq bahut thā suḳhan-shanāsī meñ

bezār karoge dil ham se yā minnat-e-dar se rokoge
vo dil to hamāre bas meñ hai kis taur use samjhāoge tum

puurī na agar ho to koī chiiz nahīñ hai
nikle jo mire dil se to hasrat hai baḌī chiiz

ka.aba-o-but-ḳhāna vāloñ se judā baiThe haiñ ham
ik but-e-nā-āshnā se dil lagā baiThe haiñ ham

dil kān-e-ma.arifat kā thā ik jauhar-e-latīf
go unsurī vajūd meñ ye ḳhaak posh thā

sarf-e-nazāra chashm thī vaqf-e-kalām-e-gosh
dil jalva-mast aur lab-e-'sāhir' ḳhamosh thā

afsos shikāyat-e-nihānī na ga.ī
dil par se raqīb kī girānī na ga.ī

baal dekhe haiñ jab suuñ maiñ tere
zulf sī dil kuuñ be-qarārī hai