Tags-Dil

chāragar ko ḳhabar nahīñ shāyad
dard-e-dil kī kuchh davā hī nahīñ

ham ne is dil ko laakh samjhāyā
zor dil par magar chalā hī nahīñ

ye mirā dil to ho chukā terā
mere bas meñ vo ab rahā hī nahīñ

'qatīl' ye vasl ke zamāne hasīn bhī haiñ tavīl bhī haiñ
magar lagā hai ye dil ko dhaḌkā inheñ koī muḳhtasar na kar de

mansūb hoñgī aur bhī us se hikāyateñ
ye zaḳhm-e-dil ki aaj hai jo be-libās bhī

ye kis maqām-e-tamannā se dil guzarne lagā
havā hai jism meñ ik zahr sā utarne lagā

huā kuchh is tarah insāf bhī ravā 'jamshed'
ki munsifoñ se dil-e-be-gunāh Darne lagā

le ke ham dil ga.e kahte ye jafā-kāroñ meñ
kaun letā hai ise itne ḳharīdāroñ meñ

pheñk denā na kahīñ bhuul ke hañgām-e-sahar
dil bhī lipTā hai inhīñ sūkhe hue hāroñ meñ

fasl-e-gul meñ dil-e-vahshī kā chalan mat pūchho
aise mausam meñ to ye āfat-e-jāñ hotā hai

hasrat-e-dil ko maar kar dekhā
bojh saarā utaar kar dekhā

dāġh-e-dil ko raushan kar ġham kī raat hai lambī
sham.a kā bharosa kyā mah bhī bevafā sī hai

ghabrā.e jitnā maut kī dil-bastagī se ham
begāna utne hote ga.e zindagī se ham

ḳhud apne dil se ho ga.e begāna is tarah
jaise jhijak rahe hoñ kisī ajnabī se ham

ham apne dil ko maqām-e-ḳhudā samajhte haiñ
yahī hai der ab apnā yahī haram apnā

bahut ḳhulūs 'munavār' ke dil meñ paatā huuñ
ajiib shaḳhs hai ye dost mohtaram apnā

dil ko patthar na banāo apne
mom kī tarah pighalnā sīkho

ye to ham haiñ baḌe dil vaale jo kah dete haiñ
varna āsān nahīñ apne se behtar kahnā

dam bhar kī hañsī dam bhar kī ḳhushī ye bhī to dil-e-nākām nahīñ
is chaltī-phirtī duniyā meñ sab kuchh hai magar ārām nahīñ

nazroñ meñ tasādum dil meñ chubhan ik sham.a hai ik parvāna hai
donoñ hī meñ bāteñ hotī haiñ āvāz kā lekin naam nahīñ