Tags-Dil

'madnī' qafas meñ sub.h huī aur us ke ba.ad
dil se dhuāñ bhī hasrat-e-parvāz se uThā

jo bujhī sham-e-dil to baḌhī raushnī jo piyā zahr-e-ġham to baḌhī zindagī
ye tū hī ab batā zarā munsifī ye tirā kaam thā ki mirā kaam thā

āñkhoñ meñ abhī dhuul sī lamhoñ kī jamī hai
dil meñ koī sailāb sā rone ke liye hai

dil ko to bahut pahle se dhaḌkā sā lagā thā
paanā tirā shāyad tujhe khone ke liye hai

dil-e-afsurda sar-e-shām sulag uThtā hai
sāhil-e-jāñ rakhe ab kaise bharam tak us kā

paanī se sag-gazīda Dare jis tarah 'asad'
Dartā huuñ aa.ine se ki mardum-gazīda huuñ

kitne ġhamoñ kā baar uThā.e hue hai dil
ik zāviye se shīsha-e-nāzuk bhī sañg hai

ḳhālī bhī to kar ḳhāna-e-dil duniyā se
is ghar meñ mirī jaan ḳhudā aa.egā

ummīd ki lau jaagā ġham-e-dil kā nasība
lo shauq kī tarsī huī shab ho ga.ī āḳhir

phir dekhe haiñ vo hijr ke tapte hue din bhī
jab fikr-e-dil-o-jāñ meñ fuġhāñ bhuul ga.ī hai

tanhā.ī meñ kyā kyā na tujhe yaad kiyā hai
kyā kyā na dil-e-zār ne DhūñDī haiñ panāheñ

jagah bachī hī nahīñ dil pe choT khāne kī
uThā lo kaash ye aadat jo āzmāne kī

sāmān to gayā thā magar ghar bhī le gayā
ab ke fasād dil se mire Dar bhī le gayā

ḳhayāl us saf-e-mizhgāñ kā dil meñ aa.egā
hamāre mulk meñ bhartī sipāh kī hogī

sirf āñkheñ thiiñ abhī un meñ ishāre nahīñ the
dil pe mausam ye mohabbat ne utāre nahīñ the

kahāñ kahāñ pe jalā.ūñ dil-o-nazar ke charāġh
har ek ghar meñ añdherā dikhā.ī detā hai

shā.er fikr-o-nazar kā mālik dil kā sultāñ ghar kā faqīr
duniyā kā pāmāl qadam bhī duniyā bhar se aage bhī

āñkheñ jo kuchh dekh rahī haiñ us se dhokā khā.eñ kyā
dil to 'ājiz' dekh rahā hai hadd-e-nazar se aage bhī

na jaane kahiye kis qālib meñ 'qā.em' dard-e-dil us se
nahīñ bantī zabāñ se dil meñ jo tamhīd karte haiñ

hamāre dil ko ik āzār hai aisā nahīñ lagtā
ki ham daftar bhī jaate haiñ ġhazal-ḳhvānī bhī karte haiñ