Tags-Dil

'vāmiq' ye dil kī pyaas bhalā yuuñ bujhegī kyā
ab aag hī se aag bujhāo nashe meñ aao

na to be-qufl hai darīcha-e-zehn
na dar-e-dil khulā huā hai koī

mubtalā ruuh ke azaab meñ huuñ
kab se dil ko khurach rahā hai koī

dil ke miT jaane se josh-e-ishq ghaT saktā hai kyā
dil se kyā matlab ki ye saudā to mere sar meñ hai

tū āshnā-e-jazba-e-ulfat nahīñ rahā
dil meñ tire vo zauq-e-mohabbat nahīñ rahā

aa.iiñ kahāñ se aañkh meñ ātish-chikāniyāñ
dil āshnā-e-soz-e-mohabbat nahīñ rahā

sāhab diloñ se raah meñ āñkheñ milā ke dekh
rakhtā hai tū bhī dil to use aazmā ke dekh

mujhe dushman kā bhī dil toḌnā achchhā nahīñ lagtā
kisī kī bad-duāoñ kā asar hone se Dartī huuñ

mire jurm-e-ishq kī is qadar mujhe ai nadīm sazā na de
mire dil pe itnī jafā na kar mujhe yuuñ nazar se girā na de

hai ḳhamosh ātish-e-zindagī magar ik sharar tire ishq kā
mire dil meñ ab bhī chamak rahā hai use bhī yaas bujhā na de

kyuuñ dil hai be-qarār mujhe kuchh pata nahīñ
kis kā hai intizār mujhe kuchh pata nahīñ

daulat-e-dahr sab luTā.ī hai
maiñ ne dil kī kamā.ī khaa.ī hai

vo jo sarmāya-e-dil-o-jāñ thī
ab vahī aarzū parā.ī hai

ishq mere gumān meñ yārāñ
dil kī ik zor āzmā.ī hai

us meñ rah kar bhī maiñ nahīñ us meñ
jāniye dil meñ kyā samā.ī hai

aa jaatā hai in bātoñ meñ duniyā ke mirā dil
juT jaatā huuñ maiñ kaam meñ jī-jān lagā kar

āshiq to jānte haiñ vo ai dil yahī sahī
har-chand be-asar hai par aah o fuġhāñ na chhoḌ

nā-chār deñge aur kisī ḳhūb-rū ko dil
achchhā tū apnī ḳhū-e-bad ai bad-zabāñ na chhoḌ

dariyā kī lahroñ se ye ayaañ hai ki juuñ hubāb
rakhte haiñ dil ko jam.a pareshāniyoñ meñ ham

dil ke jaane kā ba-har-sūrat bahut sadma huā
us se vābasta ka.ī logoñ ke afsāne bhī the