Tags-Aah

maiñ jāntā huuñ ki hai irtiqā kī kyā sūrat
maiñ aah ban ke uThā abr ban ke barsā huuñ

maiñ zulmat-e-shab meñ le ke niklūñgā apne darmāñda kārvāñ ko
shah nishāñ hogī aah merī nafas mirā sho.ala baar hogā

kab khelne pakaḌ ke havā meñ se laa.e vo
jugnū jo aah dal ke sharāre hue to kyā

us vāste kāñpūñ huuñ ki hai aah nipaT sard
ye baav kaleje ke kahīñ paar na hove

faiz-e-mausam hī sahī sehr-e-taġhayyur hī sahī
barq girtī hai magar aah kī tāsīr ke saath

kyuuñ nā-murād aah ga.ī āsmān par
TuuTe na āsmān kahīñ merī jaan par

vo jo haiñ tārīḳh se vāqif batā.eñ
farq bād-e-āh o bād-e-ād meñ

tabīb subuk-e-aql hargiz na samjhā
huā dard-e-ishq aah duunā davā se

bañdh ga.ī baaġh meñ terī to havā bād-e-sabā
un ke kūche meñ mirī aah kī bañdh jaa.e havā

sar pe chhan chhan kar balā.eñ ā.eñgī ḳhāmosh 'qadr'
aah khīñchoge to chhalnī āsmāñ ho jā.egā

ai āh-e-dil jo jaave to arsh-e-barīn ko
kahiyo salām iisā gardūñ-nashīn ko

mujh diljale kī nabz jo dekhī tabīb ne
kahne lagā ki aah mirā haath jal gayā

koī dād-e-dil aah kis se kare
har ik hai so us fitna-gar kī taraf

aa gayā rahm us ke dil meñ aah
ham ne yuuñ apnī marg Thānī thī

aaj maiñ ne gunāh kar Daalā
aah pe vāh-vāh kar Daalā

mirī kashti-e-dil dam-e-āh-o-afġhāñ
kabhī bādbānī to kabhī dahānī

ye ek aah mohabbat kī tarjumān nahīñ
bahut tavīl the qisse jo muḳhtasar pahuñche

rahe raqīb se bāham vo sīm-bar mahzūz
huā na aah kā apne kabhī asar mahzūz

mahār-e-nāqa-e-lailā tū khīñch le ai aah
haTā de dast-e-talab baḌh ke parde mahmil ke

had bos-o-kanār aur jo thā us ke sivā aah
gar vo bhī mayassar huā haihāt to phir kyā