batā.e detī hai be-pūchhe raaz sab dil ke
nigāh-e-shauq kisī kī nigāh se mil ke
nikāle hausle maqtal meñ apne bismil ke
nisār teġh ke qurbān aise qātil ke
maiñ us pe sadqe jo jaa.e kisī kī yaad meñ jaañ
kisī ko chāhe maiñ qurbān jā.ūñ us dil ke
baḌī adāoñ se lī jaan apne kushte kī
hazār baar maiñ qurbān apne qātil ke
ġhubār-e-qais nahīñ hai to kaun hai lailā
koī to hai ki jo phirtā hai gird mahmil ke
vo phuuT bahne meñ mashshāq haiñ ye rone meñ
raheñge dab ke na āñkhoñ se aable dil ke
mahār-e-nāqa-e-lailā tū khīñch le ai aah
haTā de dast-e-talab baḌh ke parde mahmil ke
vo dil meñ haiñ magar āñkhoñ se duur haiñ 'bedam'
paḌā huā huuñ maiñ pyāsā qarīb sāhil ke