Tags-But

dil-e-āzād ko vahshat ne baḳhshā hai vo kāshāna
ki ik dar jānib-e-ka.aba hai ik dar sū-e-but-ḳhāna

na mehrāb-e-haram samjhe na jaane tāq-e-but-ḳhāna
jahāñ dekhī tajallī ho gayā qurbān parvāna

yā bahr-e-tavāf-e-ka.aba ga.e yā mo.atakif-e-but-ḳhāna hue
kyā shaiḳh o barhaman ham ne kiyā ye bhī na huā vo bhī na huā

chhoḌā na tujhe ne raam kyā ye bhī na huā vo bhī na huā
ham se to but-e-kāfir ba-ḳhudā ye bhī na huā vo bhī na huā

sukūt-e-but-kada-e-āzarī se tañg aa kar
ḳhudā ko maiñ ne pukārā hai dekhiye kyā ho

be-ḳhudī meñ pahlū-e-iqrār pahle to na thā
itnā ġhāfil vo but-e-ayyār pahle to na thā

sar hī ham phoḌne jaa.eñ to kahāñ jā.eñge
khokhle kāñch ke but haiñ tire but-ḳhānoñ meñ

ḳhud ko pahroñ thakātī huuñ maiñ
yaad ke but banātī huuñ maiñ

kabhī qat.a kī mirī guftugū kabhī kah diyā mujhe kyā hai tū
ye batā tū o but-e-jañg-jū koī ye bhī tarz-e-kalām hai

dil meñ rahte jo mire aur hī kuchh ho jaate
ye vo ka.aba hai ki but jis meñ ḳhudā hote haiñ

tū gosh-e-dil se sune us ko gar but-e-be-mehr
fasāna turfa hai aur mājrā hai zor mirā

ai dost ham se kufr-e-mohabbat kā dars le
asrār-e-kāfirī na but-e-barahman se pūchh

ne but-kada se kaam na matlab haram se thā
mahv-e-ḳhayāl-e-yār rahe ham jahāñ rahe

mohabbat but-kade meñ chal ke us kā faisla kar de
ḳhudā merā ḳhudā hai yā ye mūrat hai ḳhudā merī

kisī kā jalva-e-rañgīñ ye kahtā hai inheñ puujo
ye us patthar ke but haiñ jis pe pistī thī hinā merī

ḳhudā se vaqt-e-duā ham savāl kar baiThe
vo but bhī dil ko zarā ab sambhāl kar baiThe

but-kade meñ to tujhe dekh liyā kartā thā
ḳhaas ka.abe meñ to sūrat bhī dikhā.ī na ga.ī

bisāt-e-ulfat hai vo nirālī jahāñ meñ jāñ-bāḳhta khilāḌī
juā bhī ye but jo khelte haiñ to dil kī kauḌī uchhālte haiñ

surḳh patthar ke sanam hoñ ki vo patthar ke sanam
but-kadoñ meñ to ibādat nahīñ hogī ham se